ye sach hai charaghan tha ujala bhi bahut tha

ye sach hai charāġhāñ thā ujālā bhī bahut thā

bastī ko magar ḳhauf havā kā bhī bahut thā

jis ghar ke dar-o-bām pe dekhe ga.e sho.ale

kuchh roz se us ghar meñ añdherā bhī bahut thā

achchhā hai jo duniyā ne mujhe chhoḌ diyā hai

maiñ bhiiḌ ke hamrāh akelā bhī bahut thā

mausam ne jise kar diyā be-barg-o-barahna

suntā huuñ ki us peḌ meñ saayā bhī bahut thā

ab dhuup meñ sotā hai jo khole hue āñkheñ

guzrī huī rātoñ meñ vo jaagā bhī bahut thā

kyuuñ toḌ ke jaatā na vo ā.īna hamārā

ham ne use shīshe meñ utārā bhī bahut thā

haiñ ret meñ insān ke udhḌe hue nāḳhun

hairat kī nahīñ baat vo pyāsā bhī bahut thā

'kāzim' thī bahut qadr kabhī ahl-e-qalam kī

duniyā meñ kabhī naam hamārā bhī bahut thā

ye sach hai charaghan tha ujala bhi bahut tha

basti ko magar KHauf hawa ka bhi bahut tha

jis ghar ke dar-o-baam pe dekhe gae shoale

kuchh roz se us ghar mein andhera bhi bahut tha

achchha hai jo duniya ne mujhe chhoD diya hai

main bhiD ke hamrah akela bhi bahut tha

mausam ne jise kar diya be-barg-o-barahna

sunta hun ki us peD mein saya bhi bahut tha

ab dhup mein sota hai jo khole hue aankhen

guzri hui raaton mein wo jaga bhi bahut tha

kyun toD ke jata na wo aaina hamara

hum ne use shishe mein utara bhi bahut tha

hain ret mein insan ke udhDe hue naKHun

hairat ki nahin baat wo pyasa bhi bahut tha

'kazim' thi bahut qadr kabhi ahl-e-qalam ki

duniya mein kabhi nam hamara bhi bahut tha