ye sadma usko pagal kar gaya tha

ye sadma us ko pāgal kar gayā thā

vo apne aa.ine se Dar gayā thā

koī bhī sar nahīñ thā us ke qābil

abas us shahr meñ patthar gayā thā

jahālat ke havāle paḌhte paḌhte

kitāboñ se mirā jī bhar gayā thā

pilātā kaun us pyāse ko paanī

koī masjid koī mandar gayā thā

vo kis miTTī kā thā nafrat ke ghar meñ

vo oḌhe pyaar kī chādar gayā thā

mirā ehsās to tere karam se

mire marne se pahle mar gayā thā

na niklā phir vo saarī umr ghar se

zarā sī der ko bāhar gayā thā

to phir luuTā hai kis ne qāfile ko

udhar to sirf ik rahbar gayā thā

vahāñ phir pair kab rakkhā kisī ne

jahāñ raste meñ merā sar gayā thā

ye sadma us ko pagal kar gaya tha

wo apne aaine se Dar gaya tha

koi bhi sar nahin tha us ke qabil

abas us shahr mein patthar gaya tha

jahaalat ke hawale paDhte paDhte

kitabon se mera ji bhar gaya tha

pilata kaun us pyase ko pani

koi masjid koi mandar gaya tha

wo kis miTTi ka tha nafrat ke ghar mein

wo oDhe pyar ki chadar gaya tha

mera ehsas to tere karam se

mere marne se pahle mar gaya tha

na nikla phir wo sari umr ghar se

zara si der ko bahar gaya tha

to phir luTa hai kis ne qafile ko

udhar to sirf ek rahbar gaya tha

wahan phir pair kab rakkha kisi ne

jahan raste mein mera sar gaya tha