ye sar-ba-mohr botalen hain jo sharab ki

ye sar-ba-mohr botaleñ haiñ jo sharāb kī

rāteñ haiñ un meñ band hamārī shabāb kī

pūchho na ham se ālam-e-ġhaflat ke ḳhvāb kī

duniyā kuchh aur hī thī hamāre shabāb kī

ye nashsha aañkh dekh ke us mast ḳhvāb kī

jaise abhī chaḌhā.ī ho botal sharāb kī

surḳhī shafaq kī shakl mah-o-āftāb kī

chhalkī huī sharāb hai jām-o-sharāb kī

kyuuñ TūTtī haiñ bijliyoñ par aaj bijliyāñ

shāyad girah khulī tire band-e-naqāb kī

mīnā-o-jām dekh ke ḳhush hogā mohtasib

samjhegā vo khilī huī kaliyāñ gulāb kī

thī sar-ba-mohr phuuT ga.ī apne zor meñ

tauba se pahle TuuTī hai botal sharāb kī

sharmā ga.iiñ jo bosa-e-lab baaġh meñ liyā

simTī haiñ kyā khilī huī kaliyāñ gulāb kī

ham ne tamām umr meñ kitnī sharāb pī

shāyad batā sake hameñ mīzāñ hisāb kī

chehre kā rañg dekh lo tum rakh ke aa.ina

bose se dauḌ jā.egī surḳhī shahāb kī

mahfil meñ pī jo phuul to is ehtiyāt se

mīnā-e-mai ne bū na kabhī dī sharāb kī

ai kasrat-e-gunāh tire Dar se dab ga.ī

dekhā mujhe ki jhuk ga.ī mīzāñ hisāb kī

zarra havā meñ bhar ke banā aadmī kī shakl

qatra havā meñ bhar ke hai sūrat habāb kī

chakkar havā ne itne diye haiñ ki gard-e-bād

tasvīr ban gayā hai mire pech-o-tāb kī

saa.e se us kī zulf ke bint-e-inab ko kyā

ban kar parī uḌegī ye botal sharāb kī

ye kah ke kal dikhā.e unheñ pāra-e-jigar

bikhrī huī ye pañkhuḌiyāñ haiñ gulāb kī

har shaam saath laatī hai ik chaudhvīñ kā chāñd

kyā jāneñ kyā kareñgī ye rāteñ shabāb kī

kam-baḳht ne sharāb kā zikr is qadar kiyā

vaa.iz ke muñh se aane lagī bū sharāb kī

do ghūñT par sharāb ke hai hasr zindagī

rāteñ shabāb kī haiñ na bāteñ shabāb kī

kaam aa.egī 'riyāz' ke mashq-e-tavāf-e-ḳhum

ka.abe ke gird hoñge jo sūjhī savāb kī

ye sar-ba-mohr botalen hain jo sharab ki

raaten hain un mein band hamari shabab ki

puchho na hum se aalam-e-ghaflat ke KHwab ki

duniya kuchh aur hi thi hamare shabab ki

ye nashsha aankh dekh ke us mast KHwab ki

jaise abhi chaDhai ho botal sharab ki

surKHi shafaq ki shakl mah-o-aftab ki

chhalki hui sharab hai jam-o-sharab ki

kyun TuTti hain bijliyon par aaj bijliyan

shayad girah khuli tere band-e-naqab ki

mina-o-jam dekh ke KHush hoga mohtasib

samjhega wo khili hui kaliyan gulab ki

thi sar-ba-mohr phuT gai apne zor mein

tauba se pahle TuTi hai botal sharab ki

sharma gain jo bosa-e-lab bagh mein liya

simTi hain kya khili hui kaliyan gulab ki

hum ne tamam umr mein kitni sharab pi

shayad bata sake hamein mizan hisab ki

chehre ka rang dekh lo tum rakh ke aaina

bose se dauD jaegi surKHi shahab ki

mahfil mein pi jo phul to is ehtiyat se

mina-e-mai ne bu na kabhi di sharab ki

ai kasrat-e-gunah tere Dar se dab gai

dekha mujhe ki jhuk gai mizan hisab ki

zarra hawa mein bhar ke bana aadmi ki shakl

qatra hawa mein bhar ke hai surat habab ki

chakkar hawa ne itne diye hain ki gard-e-baad

taswir ban gaya hai mere pech-o-tab ki

sae se us ki zulf ke bint-e-inab ko kya

ban kar pari uDegi ye botal sharab ki

ye kah ke kal dikhae unhen para-e-jigar

bikhri hui ye pankhuDiyan hain gulab ki

har sham sath lati hai ek chaudhwin ka chand

kya jaanen kya karengi ye raaten shabab ki

kam-baKHt ne sharab ka zikr is qadar kiya

waiz ke munh se aane lagi bu sharab ki

do ghunT par sharab ke hai hasr zindagi

raaten shabab ki hain na baaten shabab ki

kaam aaegi 'riyaz' ke mashq-e-tawaf-e-KHum

kabe ke gird honge jo sujhi sawab ki