ye shaKH-e-hunar apni jo gul-e-rez rahi hai

ye shāḳh-e-hunar apnī jo gul-e-rez rahī hai

majrūh tah-e-ḳhanjar-e-chañgez rahī hai

dam lo ki zarā qāfila-e-vaqt bhī aa le

yaañ gardish-e-paimāna baḌī tez rahī hai

insānoñ ke dukh-sukh meñ barābar rahī shāmil

ye tab.a jo zāhir meñ kam-āmez rahī hai

us ġhamza-e-pinhāñ kī halāvat bhī atā ho!

jis bin mai-e-ishrat bhī ġham-añgez rahī hai

sad ma.arka-e-nūr-o-ziyā dil ko hai darpesh

ye merī ḳhudī kitnī ḳhud-āvez rahī hai

har sub.h tan-e-zār ko kuchlā huā paayā

bas rūh-e-tapish-dīda sahar-ḳhez rahī hai

piite rahe ham us ko tire husn kī ḳhātir

sāqī! ye tirī mai ki sam-āmez rahī hai

vaañ ġhunche khile aur yahāñ zaḳhm rise haiñ

har mauj-e-sabā ḳhanjar-e-ḳhūñ-rez rahī hai

ye shaKH-e-hunar apni jo gul-e-rez rahi hai

majruh tah-e-KHanjar-e-changez rahi hai

dam lo ki zara qafila-e-waqt bhi aa le

yan gardish-e-paimana baDi tez rahi hai

insanon ke dukh-sukh mein barabar rahi shamil

ye taba jo zahir mein kam-amez rahi hai

us ghamza-e-pinhan ki halawat bhi ata ho!

jis bin mai-e-ishrat bhi gham-angez rahi hai

sad marka-e-nur-o-ziya dil ko hai darpesh

ye meri KHudi kitni KHud-awez rahi hai

har subh tan-e-zar ko kuchla hua paya

bas ruh-e-tapish-dida sahar-KHez rahi hai

pite rahe hum us ko tere husn ki KHatir

saqi! ye teri mai ki sam-amez rahi hai

wan ghunche khile aur yahan zaKHm rise hain

har mauj-e-saba KHanjar-e-KHun-rez rahi hai