ye shan-e-wafa gham ki hikayat se mili hai

ye shān-e-vafā ġham kī hikāyat se milī hai

daulat mujhe ye dard-e-mohabbat se milī hai

aalam ko bahārāñ hai kiye us kī tamanna

gulshan ko mahak phuul kī sohbat se milī hai

ik hashr hai us kā kisī kūche se guzarnā

raftār kī had hadd-e-qayāmat se milī hai

zarre se jo suntā huuñ maiñ sūraj kī kahānī

ye āgahī muddat kī riyāzat se milī hai

mushkil kī har ik shakl pe merā hai tasarruf

mujh ko ye sanad shāh-e-vilāyat se milī hai

is qaum ke ab koī bhaTakne kā nahīñ Dar

manzil jise sadiyoñ kī masāfat se milī hai

tum yaad na rakkho mujhe lekin ye rahe yaad

shohrat tumheñ merī hī mohabbat se milī hai

ye shan-e-wafa gham ki hikayat se mili hai

daulat mujhe ye dard-e-mohabbat se mili hai

aalam ko bahaaran hai kiye us ki tamanna

gulshan ko mahak phul ki sohbat se mili hai

ek hashr hai us ka kisi kuche se guzarna

raftar ki had hadd-e-qayamat se mili hai

zarre se jo sunta hun main suraj ki kahani

ye aagahi muddat ki riyazat se mili hai

mushkil ki har ek shakl pe mera hai tasarruf

mujh ko ye sanad shah-e-wilayat se mili hai

is qaum ke ab koi bhaTakne ka nahin Dar

manzil jise sadiyon ki masafat se mili hai

tum yaad na rakkho mujhe lekin ye rahe yaad

shohrat tumhein meri hi mohabbat se mili hai