ye shahr-e-zat bahut hai agar banaya jae

ye shahr-e-zāt bahut hai agar banāyā jaa.e

to kā.enāt ko kyuuñ dard-e-sar banāyā jaa.e

zarā sī der ko ruk kar kisī jazīre par

samundaroñ kā safar muḳhtasar banāyā jaa.e

ab ek ḳhema lage dushmanoñ kī bastī meñ

duā-e-shab ko nishān-e-sahar banāyā jaa.e

yahī kaTe hue baazū alam kiye jaa.eñ

yahī phaTā huā siina sipar banāyā jaa.e

sunā ye hai ki vo dariyā utar gayā āḳhir

to aao phir usī retī pe ghar banāyā jaa.e

ajab masāf sukūt o suḳhan meñ jaarī hai

kise vasīla-e-arz-e-hunar banāyā jaa.e

ye shahr-e-zat bahut hai agar banaya jae

to kaenat ko kyun dard-e-sar banaya jae

zara si der ko ruk kar kisi jazire par

samundaron ka safar muKHtasar banaya jae

ab ek KHema lage dushmanon ki basti mein

dua-e-shab ko nishan-e-sahar banaya jae

yahi kaTe hue bazu alam kiye jaen

yahi phaTa hua sina sipar banaya jae

suna ye hai ki wo dariya utar gaya aaKHir

to aao phir usi reti pe ghar banaya jae

ajab masaf sukut o suKHan mein jari hai

kise wasila-e-arz-e-hunar banaya jae