ye shoKHiyan ye KHumar jaise sharab aankhen

ye shoḳhiyāñ ye ḳhumār jaise sharāb āñkheñ

dikhā rahī haiñ har ek shab ham ko ḳhvāb āñkheñ

hameñ yaqīñ hai ki cameroñ kī nahīñ zarūrat

hamārā har pal jo kartī haiñ ehtisāb āñkheñ

lage hue haiñ qatār meñ be-shumār 'āqib'

na jaane kis kā kareñgī ab intiḳhāb āñkheñ

savāl dil ne kiyā mohabbat kā Darte Darte

to de rahī haiñ adā se jhuk kar javāb āñkheñ

hai rū-e-mahbūb sāmne us ghaḌī ki jis kā

tavāf kar ke kamā rahī haiñ savāb āñkheñ

palaT palaT kar ye dekhtī haiñ hamārī jānib

jo apne qaarī kī muntazir vo kitāb āñkheñ

maiñ do hī āñkheñ liye zamāne ko dekhtā thā

magar mujhe dekhtī rahīñ be-shumār āñkheñ

sanad mohabbat kī āshiqoñ ne yahīñ se paa.ī

kisī university kā jāma.a nisāb āñkheñ

kabhī sarāpā karam haiñ 'āqib' sarāpā rahmat

jo phir ga.iiñ to huiiñ sarāpā azaab āñkheñ

ye shoKHiyan ye KHumar jaise sharab aankhen

dikha rahi hain har ek shab hum ko KHwab aankhen

hamein yaqin hai ki cameron ki nahin zarurat

hamara har pal jo karti hain ehtisab aankhen

lage hue hain qatar mein be-shumar 'aqib'

na jaane kis ka karengi ab intiKHab aankhen

sawal dil ne kiya mohabbat ka Darte Darte

to de rahi hain ada se jhuk kar jawab aankhen

hai ru-e-mahbub samne us ghaDi ki jis ka

tawaf kar ke kama rahi hain sawab aankhen

palaT palaT kar ye dekhti hain hamari jaanib

jo apne qari ki muntazir wo kitab aankhen

main do hi aankhen liye zamane ko dekhta tha

magar mujhe dekhti rahin be-shumar aankhen

sanad mohabbat ki aashiqon ne yahin se pai

kisi uniwersity ka jama nisab aankhen

kabhi sarapa karam hain 'aqib' sarapa rahmat

jo phir gain to huin sarapa azab aankhen