ye sina ishq se mahrum-e-dard-o-dagh nahin

ye siina 'ishq se mahrūm-e-dard-o-dāġh nahīñ

hazār shukr ki ye mulk be-charāġh nahīñ

mat iḳhtilāt kar ai nau-bahār ab ham se

chaman ke hone kā is ḳhaak ko dimāġh nahīñ

ye bulbuloñ kā sabā mash.had-e-muqaddas hai

qadam sañbhāl ke rakhiyo tirā ye baaġh nahīñ

ḳhudā kare ki ye raushan rahe qayāmat tak

charāġh-e-gor hai mastoñ kā ye ayāġh nahīñ

galī meñ yaar kī dil bhuul jā paḌā thā 'yaqīñ'

phir un dinoñ se divāne kā kuchh surāġh nahīñ

ye sina 'ishq se mahrum-e-dard-o-dagh nahin

hazar shukr ki ye mulk be-charagh nahin

mat iKHtilat kar ai nau-bahaar ab hum se

chaman ke hone ka is KHak ko dimagh nahin

ye bulbulon ka saba mashhad-e-muqaddas hai

qadam sanbhaal ke rakhiyo tera ye bagh nahin

KHuda kare ki ye raushan rahe qayamat tak

charagh-e-gor hai maston ka ye ayagh nahin

gali mein yar ki dil bhul ja paDa tha 'yaqin'

phir un dinon se diwane ka kuchh suragh nahin