ye soch kar bahut hun pareshan aaj-kal

ye soch kar bahut huuñ pareshān āj-kal

kyoñ ho rahī hai mushkileñ āsān āj-kal

mat pūchhiye aziyyateñ be-rozgār haiñ

lagne lagā hai ghar hameñ zindān āj-kal

masrūf is liye bhī maiñ rahtā huuñ in dinoñ

paḌhne lagā huuñ 'mīr' kā dīvān āj-kal

masnad pe rah ke ḳhud ko samajhtā thā jo ḳhudā

vo bhī to phir rahā hai pareshān āj-kal

mumkin kahāñ hai ab koī ehsān maan le

matlab-parast ho gayā insān āj-kal

apne har ek zaḳhm ke badle kī chaah meñ

sab ko batā rahā huuñ maiñ 'unvān āj-kal

tum ko bhulā ke jiinā ḳhasāra to hai magar

karnā hī paḌ rahā hai ye nuqsān āj-kal

jis samt bhī 'asad' miyāñ daulat kā Dher ho

jhuktā hai us taraf hī ye mīzān āj-kal

ye soch kar bahut hun pareshan aaj-kal

kyon ho rahi hai mushkilen aasan aaj-kal

mat puchhiye aziyyaten be-rozgar hain

lagne laga hai ghar hamein zindan aaj-kal

masruf is liye bhi main rahta hun in dinon

paDhne laga hun 'mir' ka diwan aaj-kal

masnad pe rah ke KHud ko samajhta tha jo KHuda

wo bhi to phir raha hai pareshan aaj-kal

mumkin kahan hai ab koi ehsan man le

matlab-parast ho gaya insan aaj-kal

apne har ek zaKHm ke badle ki chah mein

sab ko bata raha hun main 'unwan aaj-kal

tum ko bhula ke jina KHasara to hai magar

karna hi paD raha hai ye nuqsan aaj-kal

jis samt bhi 'asad' miyan daulat ka Dher ho

jhukta hai us taraf hi ye mizan aaj-kal