ye soch rakha hai koi shikwa nahin karunga

ye soch rakhā hai koī shikva nahīñ karūñgā

maiñ apnī ġhairat mazīd rusvā nahīñ karūñgā

mirī vafā.eñ tire ravayye pe munhasir haiñ

vafā karūñgā magar ye va.ada nahīñ karūñgā

nahīñ sunā.ūñgā ab gulāboñ ko terā qissa

maiñ titliyoñ se bhī terā charchā nahīñ karūñgā

vo ik masīhā jo saarī bastī kā chārāgar hai

vo mujh se kahtā hai tujh ko achchhā nahīñ karūñgā

tum ab ke mujh ko jo rāste meñ kahīñ miloge

to dekh lenā koī ishāra nahīñ karūñgā

baḌī ummīdoñ se maiñ ne pūchhā vafā karoge

baḌe tafāḳhur se mujh se bolā nahīñ karūñgā

kisī ke Dar se maiñ jān-e-'nāsir' ko dost kah duuñ

muaaf kījegā hargiz aisā nahīñ karūñgā

ye soch rakha hai koi shikwa nahin karunga

main apni ghairat mazid ruswa nahin karunga

meri wafaen tere rawayye pe munhasir hain

wafa karunga magar ye wada nahin karunga

nahin sunaunga ab gulabon ko tera qissa

main titliyon se bhi tera charcha nahin karunga

wo ek masiha jo sari basti ka chaaragar hai

wo mujh se kahta hai tujh ko achchha nahin karunga

tum ab ke mujh ko jo raste mein kahin miloge

to dekh lena koi ishaara nahin karunga

baDi ummidon se main ne puchha wafa karoge

baDe tafaKHur se mujh se bola nahin karunga

kisi ke Dar se main jaan-e-'nasir' ko dost kah dun

muaf kijega hargiz aisa nahin karunga