ye socha hai ki mar jaen tumhaare war se pahle

ye sochā hai ki mar jaa.eñ tumhāre vaar se pahle

tumhārī jiit ho jaa.e hamārī haar se pahle

kisī lamhe tumhārā vaar kaarī ho bhī saktā hai

magar ye sar hī jā.egā mirī dastār se pahle

batā kitnā girā saktā huuñ ḳhud ko terī ḳhvāhish par

mirā me.aar bhī to hai tire me.aar se pahle

nazāra-hā-e-dilkash se guzar jaatā thā begāna

magar ai qāmat-e-zebā tire dīdār se pahle

sitāroñ kī tarah chamke hamāre ḳhuun ke chhīñTe

ki ham ne sar kaTāyā hai farāz-e-dār se pahle

talātum-ḳhez maujoñ se mujhe laḌnā to aatā hai

magar maiñ Duub saktā huuñ kabhī mañjdhār se pahle

tirā hī aks merī aañkh ke til meñ farozāñ hai

tujhe maiñ dekh saktā huuñ tire dīdār se pahle

kahīñ bhī jurm se pahle sazā vājib nahīñ hotī

koī kāfir nahīñ hotā magar inkār se pahle

na.e imkān DhūñDegī hamārī justujū 'shāhid'

ham ab ke dar banā.eñge magar dīvār se pahle

ye socha hai ki mar jaen tumhaare war se pahle

tumhaari jit ho jae hamari haar se pahle

kisi lamhe tumhaara war kari ho bhi sakta hai

magar ye sar hi jaega meri dastar se pahle

bata kitna gira sakta hun KHud ko teri KHwahish par

mera mear bhi to hai tere mear se pahle

nazara-ha-e-dilkash se guzar jata tha begana

magar ai qamat-e-zeba tere didar se pahle

sitaron ki tarah chamke hamare KHun ke chhinTe

ki hum ne sar kaTaya hai faraaz-e-dar se pahle

talatum-KHez maujon se mujhe laDna to aata hai

magar main Dub sakta hun kabhi manjdhaar se pahle

tera hi aks meri aankh ke til mein farozan hai

tujhe main dekh sakta hun tere didar se pahle

kahin bhi jurm se pahle saza wajib nahin hoti

koi kafir nahin hota magar inkar se pahle

nae imkan DhunDegi hamari justuju 'shahid'

hum ab ke dar banaenge magar diwar se pahle