ye sochta hun ki KHud aarif-e-hayat bhi hai

ye sochtā huuñ ki ḳhud ārif-e-hayāt bhī hai

bashar jo mahram-e-asrār-e-kā.enāt bhī hai

nafas nafas meñ rahe kyoñ na ik jahān-e-sifāt

mirī nigāh meñ tanvīr-e-husn-e-zāt bhī hai

diloñ ko mil nahīñ saktī thī ishrat-e-abadī

hazār shukr mohabbat meñ ġham kī raat bhī hai

vo ik ḳhayāl ki jis ne ġham-e-hayāt diyā

vahī ḳhayāl ilāj-e-ġham-e-hayāt bhī hai

jo sirr-e-ishq bhī hai rāz-e-husn-e-jānāñ bhī

yaqīñ karo mire dil meñ ik aisī baat bhī hai

ye har gunah pe jo ehsās hai nadāmat kā

mujhe to 'kaif' yahī hīla-e-najāt bhī hai

ye sochta hun ki KHud aarif-e-hayat bhi hai

bashar jo mahram-e-asrar-e-kaenat bhi hai

nafas nafas mein rahe kyon na ek jahan-e-sifat

meri nigah mein tanwir-e-husn-e-zat bhi hai

dilon ko mil nahin sakti thi ishrat-e-abadi

hazar shukr mohabbat mein gham ki raat bhi hai

wo ek KHayal ki jis ne gham-e-hayat diya

wahi KHayal ilaj-e-gham-e-hayat bhi hai

jo sirr-e-ishq bhi hai raaz-e-husn-e-jaanan bhi

yaqin karo mere dil mein ek aisi baat bhi hai

ye har gunah pe jo ehsas hai nadamat ka

mujhe to 'kaif' yahi hila-e-najat bhi hai