ye to mana ki tumhein ghair se nisbat kaisi

ye to maanā ki tumheñ ġhair se nisbat kaisī

ho rahī hai sar-e-bāzār ye shohrat kaisī

aap kī ḳhām-ḳhayālī hai faqat hazrat-e-dil

vo 'adāvat bhī nahīñ rakhte mohabbat kaisī

dard-e-furqat bhī huā shāmil-e-rashk-e-aġhyār

ye musībat meñ na.ī aur musībat kaisī

bhole-bhāle haiñ sitam un ko kahāñ se aaya

muft meñ log lagāte haiñ ye tohmat kaisī

chāhne vaale nirāle haiñ tire duniyā se

jaan qurbān kareñ tujh pe ye daulat kaisī

vasf-e-aġhyār vo mujh se hī bayāñ karte haiñ

dekhiye sūjhī hai ye un ko sharārat kaisī

mudda'ā ye hai ki taḌpā hī kare furqat meñ

vo jatāte haiñ mohabbat dam-e-ruḳhsat kaisī

vasl meñ sharf ne chhoḌā thā ba-mushkil dāman

darmiyāñ ho ga.ī haa.il ye nazākat kaisī

ḳhud-baḳhud pyaar jise dekhte hī aatā hai

pyārī pyārī hai ḳhudā rakkhe vo sūrat kaisī

jo tirī chaal se barpā ho vo fitna kaisā

jo tirī raah se uTThe vo qayāmat kaisī

ḳhāna-e-dahr hai goyā ki musāfir-ḳhāna

ġhāfilo niiñd sar-e-bistar-e-rāhat kaisī

vo to aa.e the magar maiñ na unheñ rok sakā

haath aa kar mire jaatī rahī daulat kaisī

ḳhvāhish-e-vasl pe vo shoḳh ye hañs kar bolā

chuTkiyāñ letī rahe dil meñ vo hasrat kaisī

mai ho mā’shūq baġhal meñ ho janāb-e-vā’iz

dekhiye phir ki bahaltī hai tabī'at kaisī

laakh ‘ishrat ke hoñ sāmān magar ai 'hājir'

rāhat-e-jāñ na baġhal meñ ho to rāhat kaisī

ye to mana ki tumhein ghair se nisbat kaisi

ho rahi hai sar-e-bazar ye shohrat kaisi

aap ki KHam-KHayali hai faqat hazrat-e-dil

wo 'adawat bhi nahin rakhte mohabbat kaisi

dard-e-furqat bhi hua shamil-e-rashk-e-aghyar

ye musibat mein nai aur musibat kaisi

bhole-bhaale hain sitam un ko kahan se aaya

muft mein log lagate hain ye tohmat kaisi

chahne wale nirale hain tere duniya se

jaan qurban karen tujh pe ye daulat kaisi

wasf-e-aghyar wo mujh se hi bayan karte hain

dekhiye sujhi hai ye un ko shararat kaisi

mudda'a ye hai ki taDpa hi kare furqat mein

wo jatate hain mohabbat dam-e-ruKHsat kaisi

wasl mein sharf ne chhoDa tha ba-mushkil daman

darmiyan ho gai hail ye nazakat kaisi

KHud-baKHud pyar jise dekhte hi aata hai

pyari pyari hai KHuda rakkhe wo surat kaisi

jo teri chaal se barpa ho wo fitna kaisa

jo teri rah se uTThe wo qayamat kaisi

KHana-e-dahr hai goya ki musafir-KHana

ghafilo nind sar-e-bistar-e-rahat kaisi

wo to aae the magar main na unhen rok saka

hath aa kar mere jati rahi daulat kaisi

KHwahish-e-wasl pe wo shoKH ye hans kar bola

chuTkiyan leti rahe dil mein wo hasrat kaisi

mai ho ma’shuq baghal mein ho janab-e-wa’iz

dekhiye phir ki bahalti hai tabi'at kaisi

lakh ‘ishrat ke hon saman magar ai 'hajir'

rahat-e-jaan na baghal mein ho to rahat kaisi