ye to nahin ki baadiya-paima na aaega

ye to nahīñ ki bādiya-paimā na aa.egā

ai dasht-e-ārzū koī ham sā na aa.egā

chalnā nasīb-e-zīst hai yuuñ hī chale chalo

is rāste meñ shahr-e-tamannā na aa.egā

rāh-e-vafā meñ qatra-e-shabnam bhī hai bahut

jis se bujhegī pyaas vo dariyā na aa.egā

ḳhud ho sake to apne añdhere ujaal lo

ab koī sāhab-e-yad-e-baizā na aa.egā

ai ahl-e-dil ḳhamosh ki ye jā-e-sabr hai

dukh to yūñhī raheñge masīhā na aa.egā

gaahe vufūr-e-shauq to gaahe hujūm-e-yās

sab kuchh to aa.egā hameñ jiinā na aa.egā

baiThe raheñ 'sahar' yūñhī dīvār o dar liye

apnā jise kaheñ koī aisā na aa.egā

ye to nahin ki baadiya-paima na aaega

ai dasht-e-arzu koi hum sa na aaega

chalna nasib-e-zist hai yun hi chale chalo

is raste mein shahr-e-tamanna na aaega

rah-e-wafa mein qatra-e-shabnam bhi hai bahut

jis se bujhegi pyas wo dariya na aaega

KHud ho sake to apne andhere ujal lo

ab koi sahab-e-yad-e-baiza na aaega

ai ahl-e-dil KHamosh ki ye ja-e-sabr hai

dukh to yunhi rahenge masiha na aaega

gahe wufur-e-shauq to gahe hujum-e-yas

sab kuchh to aaega hamein jina na aaega

baiThe rahen 'sahar' yunhi diwar o dar liye

apna jise kahen koi aisa na aaega