ye ujale se karan-ta-ba-karan kaise hain

ye ujāle se karāñ-tā-ba-karāñ kaise haiñ

tere aane ke mire dil meñ gumāñ kaise haiñ

fart-e-hairat se ye ā.īna unheñ dekhtā hai

ek chehre meñ ka.ī chehre nihāñ kaise haiñ

koī shīsha hai ki patthar hai ki sapnā koī

jo na pahchān sakīñ shīsha-garāñ kaise haiñ

tere raste se judā thā mirā rasta lekin

tere dil par mire qadmoñ ke nishāñ kaise haiñ

ek uljhan hai jo ghere meñ liye rahtī hai

ham ko honā thā kahīñ aur yahāñ kaise haiñ

maiñ to phūloñ kī makīñ ḳhvāb-nagar kī baasī

phir ye aañsū mirī āñkhoñ se ravāñ kaise haiñ

ab jo lauTe ho to āñkhoñ meñ udāsī kyuuñ hai

pas-e-mizhgāñ ye sitāre se nihāñ kaise haiñ

vo jo bhaTke hī nahīñ the kabhī manzil se 'farah'

un ke chehroñ pe likhe sūd-o-ziyāñ kaise haiñ

ye ujale se karan-ta-ba-karan kaise hain

tere aane ke mere dil mein guman kaise hain

fart-e-hairat se ye aaina unhen dekhta hai

ek chehre mein kai chehre nihan kaise hain

koi shisha hai ki patthar hai ki sapna koi

jo na pahchan sakin shisha-garan kaise hain

tere raste se juda tha mera rasta lekin

tere dil par mere qadmon ke nishan kaise hain

ek uljhan hai jo ghere mein liye rahti hai

hum ko hona tha kahin aur yahan kaise hain

main to phulon ki makin KHwab-nagar ki basi

phir ye aansu meri aankhon se rawan kaise hain

ab jo lauTe ho to aankhon mein udasi kyun hai

pas-e-mizhgan ye sitare se nihan kaise hain

wo jo bhaTke hi nahin the kabhi manzil se 'farah'

un ke chehron pe likhe sud-o-ziyan kaise hain