ye wo yaqin hai jo uljhe yaqin se nikla hai

ye vo yaqīñ hai jo uljhe yaqīñ se niklā hai

hamārī haañ kā ye dhāgā nahīñ se niklā hai

ye dil hai sab se baḌā bhiik māñgne vaalā

pa zindagī kā ḳhazāna yahīñ se niklā hai

tire liye jo yaqīñ dil meñ aa gayā thā mire

vo saañp ban ke mirī āstīñ se niklā hai

falak kī chaah meñ jhūTā yaqīñ zarūrī hai

ye maan lo ki sitārā zamīñ se niklā hai

jahāñ maiñ Duub gayā aur Dūbtā hī gayā

samundaroñ kā samundar vahīñ se niklā hai

mujhe panāh mire dil-nashīñ ne dī hai sadā

mirā makān mire hī makīñ se niklā hai

ye ḳhār-e-ishq hai 'aḳhtar' maza hī detā hai

agar chubhā to kahāñ ye kahīñ se niklā hai

ye wo yaqin hai jo uljhe yaqin se nikla hai

hamari han ka ye dhaga nahin se nikla hai

ye dil hai sab se baDa bhik mangne wala

pa zindagi ka KHazana yahin se nikla hai

tere liye jo yaqin dil mein aa gaya tha mere

wo sanp ban ke meri aastin se nikla hai

falak ki chah mein jhuTa yaqin zaruri hai

ye man lo ki sitara zamin se nikla hai

jahan main Dub gaya aur Dubta hi gaya

samundaron ka samundar wahin se nikla hai

mujhe panah mere dil-nashin ne di hai sada

mera makan mere hi makin se nikla hai

ye KHar-e-ishq hai 'aKHtar' maza hi deta hai

agar chubha to kahan ye kahin se nikla hai