ye wusat-o-imkan ki had hai mere nazdik

ye vus.at-o-imkān kī had hai mire nazdīk

vo ḳhud hī azal ḳhud hī abad hai mire nazdīk

is vaqt falak ziine se baḌh kar nahīñ mujh ko

is vaqt tirā qāmat-o-qad hai mire nazdīk

chup huuñ ki mirā ḳhvāb hai idrāk se bāhar

ḳhush huuñ ki mirī aañkh sanad hai mire nazdīk

daryūza-gar-e-ishq huuñ kaasa hai mirī jaañ

har lamha mirī zaat kā rad hai mire nazdīk

madfūn hai ik ruuh mirī ḳhaak meñ 'ahmad'

ye jism faqat ek lahad hai mire nazdīk

ye wusat-o-imkan ki had hai mere nazdik

wo KHud hi azal KHud hi abad hai mere nazdik

is waqt falak zine se baDh kar nahin mujh ko

is waqt tera qamat-o-qad hai mere nazdik

chup hun ki mera KHwab hai idrak se bahar

KHush hun ki meri aankh sanad hai mere nazdik

daryuza-gar-e-ishq hun kasa hai meri jaan

har lamha meri zat ka rad hai mere nazdik

madfun hai ek ruh meri KHak mein 'ahmad'

ye jism faqat ek lahad hai mere nazdik