ye zaruri hai nazar sab ki TaToli jae

ye zarūrī hai nazar sab kī TaTolī jaa.e

baad meñ zulf-e-suḳhan bazm meñ kholī jaa.e

bol uTThegā har ik harf suḳhan kā apne

haañ magar nok-e-qalam dil meñ Dubo lī jaa.e

raushnī itnī ziyāda hai galī meñ us kī

koshisheñ laakh karūñ aañkh na kholī jaa.e

us ko vahshī bhī samajh lete haiñ āsānī se

pyaar kī bolī kisī bolī meñ bolī jaa.e

e.atibār apnā bahar-hāl vo kho detī hai

baat jo dil ke tarāzū meñ na tolī jaa.e

vaqt guzrā to koī faiz na hāsil hogā

fasl vo fasl hai jo vaqt pe bo lī jaa.e

'nūr' miltī hai kahāñ narm-mizājī sab ko

chiiz achchhī hai tabī.at meñ samo lī jaa.e

ye zaruri hai nazar sab ki TaToli jae

baad mein zulf-e-suKHan bazm mein kholi jae

bol uTThega har ek harf suKHan ka apne

han magar nok-e-qalam dil mein Dubo li jae

raushni itni ziyaada hai gali mein us ki

koshishen lakh karun aankh na kholi jae

us ko wahshi bhi samajh lete hain aasani se

pyar ki boli kisi boli mein boli jae

eatibar apna bahar-haal wo kho deti hai

baat jo dil ke taraazu mein na toli jae

waqt guzra to koi faiz na hasil hoga

fasl wo fasl hai jo waqt pe bo li jae

'nur' milti hai kahan narm-mizaji sab ko

chiz achchhi hai tabiat mein samo li jae