ye zindagi hayat-numa ho to baat hai

ye zindagī hayāt-numā ho to baat hai

ġham hī ba-qadr-e-zarf milā ho to baat hai

sho.ala-fishāniyāñ bhī tire ishq tak raheñ

is dil se phir dhuāñ bhī uThā ho to baat hai

rang-e-zamāna dekh ke tark-e-vafā sahī

dil se tirā ḳhayāl gayā ho to baat hai

āsūdagān-e-ġham kī ḳhizāñ kyā bahār kyā

dil meñ koī bhī zaḳhm khulā ho to baat hai

ahl-e-junūñ zamāne meñ rusvā hue to kyā

tū ne bhī vo fasāna sunā ho to baat hai

shikva tire taġhāful-e-paiham kā kyā kareñ

apnā bhī e.atibār kiyā ho to baat hai

'māhir' hai ḳhizr se bhī sivā gumrahī-pasand

tujh sā hasīn rāh-numā ho to baat hai

ye zindagi hayat-numa ho to baat hai

gham hi ba-qadr-e-zarf mila ho to baat hai

shoala-fishaniyan bhi tere ishq tak rahen

is dil se phir dhuan bhi uTha ho to baat hai

rang-e-zamana dekh ke tark-e-wafa sahi

dil se tera KHayal gaya ho to baat hai

aasudagan-e-gham ki KHizan kya bahaar kya

dil mein koi bhi zaKHm khula ho to baat hai

ahl-e-junun zamane mein ruswa hue to kya

tu ne bhi wo fasana suna ho to baat hai

shikwa tere taghaful-e-paiham ka kya karen

apna bhi eatibar kiya ho to baat hai

'mahir' hai KHizr se bhi siwa gumrahi-pasand

tujh sa hasin rah-numa ho to baat hai