ye zindagi jo mili hum ko kam mohabbat mein

ye zindagī jo milī ham ko kam mohabbat meñ

ki jī sake haiñ na mar paa.e ham mohabbat meñ

bas ek shaam tujhe dil ne kar diyā ruḳhsat

phir us ke ba.ad rahī aañkh nam mohabbat meñ

ye aur baat ki tū ne bhulā diye haiñ magar

hameñ to yaad haiñ tere karam mohabbat meñ

tumhārā hijr to aayā hai jaan ko jānāñ

karo nā vasl kī rut ko bhī zam mohabbat meñ

zamāne biit ga.e dekh ham nahīñ badle

jabīñ rahī tire dar par hī ḳham mohabbat meñ

shikast-e-zāt se le kar shikast-e-duniyā tak

hue haiñ dard bhī kitne baham mohabbat meñ

hamārā dil hī nahīñ maan bhī to TuuTā hai

ab is ke ba.ad nahīñ koī ġham mohabbat meñ

baḌe salīqe se ta.amīr kar rahī huuñ ghar

ki rah na jaa.e koī iiñT kam mohabbat meñ

ye zindagi jo mili hum ko kam mohabbat mein

ki ji sake hain na mar pae hum mohabbat mein

bas ek sham tujhe dil ne kar diya ruKHsat

phir us ke baad rahi aankh nam mohabbat mein

ye aur baat ki tu ne bhula diye hain magar

hamein to yaad hain tere karam mohabbat mein

tumhaara hijr to aaya hai jaan ko jaanan

karo na wasl ki rut ko bhi zam mohabbat mein

zamane bit gae dekh hum nahin badle

jabin rahi tere dar par hi KHam mohabbat mein

shikast-e-zat se le kar shikast-e-duniya tak

hue hain dard bhi kitne baham mohabbat mein

hamara dil hi nahin man bhi to TuTa hai

ab is ke baad nahin koi gham mohabbat mein

baDe saliqe se tamir kar rahi hun ghar

ki rah na jae koi inT kam mohabbat mein