ye zulm hai ki mere shahr ka jo qatil hai

ye zulm hai ki mire shahr kā jo qātil hai

hazār jaan se vo dostī ke qābil hai

mujhe hī vaar pe laatā hai har zamāne meñ

mujhe batā ye zamāna kahāñ kā 'ādil hai

lahū aur aag kā dariyā hai mere raste meñ

ki merī zaat hī raste meñ mere haa.il hai

sadāqatoñ se nikhartā hai aadmī kā shu'ūr

sadāqatoñ ko samajhnā bahut hī mushkil hai

maiñ apnī zaat meñ huuñ bahr mujh ko kyā parvā

amīr-e-shahr jo dariyā-dilī pe maa.il hai

mirī zabān se haq baat hī nikaltī hai

ye aur baat ki chhātī pe jabr kī sil hai

hai sarḳhushī kī tamannā bahut mire dil meñ

vo is liye ki ye dil ek dukh-bharā dil hai

ye zulm hai ki mere shahr ka jo qatil hai

hazar jaan se wo dosti ke qabil hai

mujhe hi war pe lata hai har zamane mein

mujhe bata ye zamana kahan ka 'adil hai

lahu aur aag ka dariya hai mere raste mein

ki meri zat hi raste mein mere hail hai

sadaqaton se nikharta hai aadmi ka shu'ur

sadaqaton ko samajhna bahut hi mushkil hai

main apni zat mein hun bahr mujh ko kya parwa

amir-e-shahr jo dariya-dili pe mail hai

meri zaban se haq baat hi nikalti hai

ye aur baat ki chhati pe jabr ki sil hai

hai sarKHushi ki tamanna bahut mere dil mein

wo is liye ki ye dil ek dukh-bhara dil hai