yun bane-sanwre hue se phul hain gulzar mein

yuuñ bane-sañvre hue se phuul haiñ gulzār meñ

sair ko niklī hoñ jaise laḌkiyāñ bāzār meñ

ye tirā husn-e-takallum ye tirā husn-e-bayāñ

TūTne lagte haiñ ā.īne tirī guftār meñ

kis ne pheñkā hai ye patthar zehn ke tālāb meñ

ek tūfāñ sā bapā hai ab mire afkār meñ

tere chehre par nazar aate haiñ apne hī nuqūsh

hai mirā dīdār bhī shāmil tire dīdār meñ

ik zamīñ kā chāñd phir hogā darīchoñ se tulūa

āsmāñ kā chāñd chhup jā.egā jab ashjār meñ

terī aamad āmad-e-fasl-e-bahārāñ ban ga.ī

phūloñ se khilne lage mere dar-o-dīvār meñ

mere sheroñ meñ na Dhal paatā tirā aks-e-jamīl

ye samundar kyā simaTtā kūza-e-izhār meñ

yun bane-sanwre hue se phul hain gulzar mein

sair ko nikli hon jaise laDkiyan bazar mein

ye tera husn-e-takallum ye tera husn-e-bayan

TuTne lagte hain aaine teri guftar mein

kis ne phenka hai ye patthar zehn ke talab mein

ek tufan sa bapa hai ab mere afkar mein

tere chehre par nazar aate hain apne hi nuqush

hai mera didar bhi shamil tere didar mein

ek zamin ka chand phir hoga darichon se tulua

aasman ka chand chhup jaega jab ashjar mein

teri aamad aamad-e-fasl-e-bahaaran ban gai

phulon se khilne lage mere dar-o-diwar mein

mere sheron mein na Dhal pata tera aks-e-jamil

ye samundar kya simaTta kuza-e-izhaar mein