yun bhi guzri hain meri sham-o-sahar pani mein

yuuñ bhī guzrī haiñ mirī shām-o-sahar paanī meñ

ashk ban ban ke bahā ḳhūn-e-jigar paanī meñ

kyā Darā.eñge ye āfāt-e-zamāna ham ko

ham banā lete haiñ jab rāh-e-safar paanī meñ

saḳht se saḳht bhī patthar na rahā phir patthar

aksar aayā hai nazar aisā asar paanī meñ

tum isī taur mire dil meñ rahā karte ho

jis tarah rahtā hai poshīda guhar paanī meñ

jazba-e-shauq-o-tasavvur kī badaulat aksar

dekhtā rahtā huuñ maiñ aks-e-qamar paanī meñ

ḳhvāhish-e-'aish-o-tarab kyuuñ ho zamāne kī use

zindagī hotī rahī jis kī basar paanī meñ

raushnī detī vo kaise rah-e-ulfat pe 'ra.īs'

sham-e-ummīd jalā.ī thī magar paanī meñ

yun bhi guzri hain meri sham-o-sahar pani mein

ashk ban ban ke baha KHun-e-jigar pani mein

kya Daraenge ye aafat-e-zamana hum ko

hum bana lete hain jab rah-e-safar pani mein

saKHt se saKHt bhi patthar na raha phir patthar

aksar aaya hai nazar aisa asar pani mein

tum isi taur mere dil mein raha karte ho

jis tarah rahta hai poshida guhar pani mein

jazba-e-shauq-o-tasawwur ki badaulat aksar

dekhta rahta hun main aks-e-qamar pani mein

KHwahish-e-'aish-o-tarab kyun ho zamane ki use

zindagi hoti rahi jis ki basar pani mein

raushni deti wo kaise rah-e-ulfat pe 'rais'

sham-e-ummid jalai thi magar pani mein