yun bhi hua ek arse tak ek sher na mujhse tamam hua

yuuñ bhī huā ik arse tak ik sher na mujh se tamām huā

aur kabhī ik raat meñ ik dīvān mujhe ilhām huā

apnī tanhā.ī kā shikva tujh ko giroh-e-ġhair se kyuuñ

ye to havas kā daur hai pyāre jis ko jis se kaam huā

maiñ apne ḳhāliq se ḳhush huuñ misl-e-alī is qismat par

daulat ahl-e-jehl ne paa.ī ilm mujhe in.aam huā

kaisī qanā.at kaisī ibādat hirs-o-havas ke aalam meñ

dil jo pahle ghar thā ḳhudā kā ab shahr-e-asnām huā

jo patthar ko mom banā de dil meñ ab vo aañch kahāñ

jis sho.ale par naaz bahut thā vo sho.ala bhī ḳhaam huā

jin ko hai islām kā da.avā 'sahbā' un kā haal bhī dekh

maiñ to ḳhair butoñ kā ho kar mahrūm-e-islām huā

yun bhi hua ek arse tak ek sher na mujh se tamam hua

aur kabhi ek raat mein ek diwan mujhe ilham hua

apni tanhai ka shikwa tujh ko giroh-e-ghair se kyun

ye to hawas ka daur hai pyare jis ko jis se kaam hua

main apne KHaliq se KHush hun misl-e-ali is qismat par

daulat ahl-e-jehl ne pai ilm mujhe inam hua

kaisi qanaat kaisi ibaadat hirs-o-hawas ke aalam mein

dil jo pahle ghar tha KHuda ka ab shahr-e-asnam hua

jo patthar ko mom bana de dil mein ab wo aanch kahan

jis shoale par naz bahut tha wo shoala bhi KHam hua

jin ko hai islam ka dawa 'sahba' un ka haal bhi dekh

main to KHair buton ka ho kar mahrum-e-islam hua