yun bhi nibah humne kiya zindagi ke sath

yuuñ bhī nibāh ham ne kiyā zindagī ke saath

ik ajnabī ho jaise kisī ajnabī ke saath

ab ke bahār aa.ī to is dilkashī ke saath

kāñTe bhī muskurā.e guloñ kī hañsī ke saath

har ġham qubūl ham ne kiyā hai ḳhushī ke saath

vābasta yuuñ hue haiñ terī barhamī ke saath

dil ko jalā ke garm kiyā aise bazm ko

jaise koī charāġh jale raushnī ke saath

tajdīd aao phir kareñ ahd-e-vafā kī aaj

aao qadam milā ke chaleñ dostī ke saath

itnī to hai hameñ bhī tavaqqo sulūk kī

ik aadmī jo kartā hai ik aadmī ke saath

merī nazar bhī jaatī hai kuchh surḳhiyoñ kī samt

aatā hai jab bhī naam kisī kā kisī ke saath

sunte haiñ mai-kashoñ meñ baḌī barhamī sī hai

saaqī pilā rahā hai magar be-ruḳhī ke saath

koī shikan jabīn-e-saḳhāvat pe aa na jaa.e

dāman ko mere dekh na dariyā-dilī ke saath

nālā-kunāñ haiñ lamhe qayām-o-sujūd ke

'paikar' namāz paḌh na sake āgahī ke saath

yun bhi nibah hum ne kiya zindagi ke sath

ek ajnabi ho jaise kisi ajnabi ke sath

ab ke bahaar aai to is dilkashi ke sath

kanTe bhi muskurae gulon ki hansi ke sath

har gham qubul hum ne kiya hai KHushi ke sath

wabasta yun hue hain teri barhami ke sath

dil ko jala ke garm kiya aise bazm ko

jaise koi charagh jale raushni ke sath

tajdid aao phir karen ahd-e-wafa ki aaj

aao qadam mila ke chalen dosti ke sath

itni to hai hamein bhi tawaqqo suluk ki

ek aadmi jo karta hai ek aadmi ke sath

meri nazar bhi jati hai kuchh surKHiyon ki samt

aata hai jab bhi nam kisi ka kisi ke sath

sunte hain mai-kashon mein baDi barhami si hai

saqi pila raha hai magar be-ruKHi ke sath

koi shikan jabin-e-saKHawat pe aa na jae

daman ko mere dekh na dariya-dili ke sath

nala-kunan hain lamhe qayam-o-sujud ke

'paikar' namaz paDh na sake aagahi ke sath