yun dahakta hai teri yaad ka tan mein suraj

yuuñ dahaktā hai tirī yaad kā tan meñ sūraj

jaise bahtā ho lahū ban ke badan meñ sūraj

kam-nigāhī se zamāne ne unheñ phuul kahā

varna ham ne to ugaa.e the chaman meñ sūraj

rāt-bhar ham ne ujāloñ kī nigahbānī kī

sub.h ko baT gayā ek ek kiran meñ sūraj

kaisī ye pyaas hai maujoñ kī jo bujhtī hī nahīñ

roz utartā hai samundar ke dahan meñ sūraj

mere saa.e ne mujhe aise chhupā rakkhā hai

jis tarah chāñd se aatā hai gahan meñ sūraj

haath meñ le ke ‘asā tum yad-e-baizā to dikhāo

log dekheñ to sahī saañp ke phan meñ sūraj

ziist ne daaġh jo baḳhshe haiñ chamakne do 'asar'

mat chhupāo abhī lafzoñ ke kafan meñ sūraj

yun dahakta hai teri yaad ka tan mein suraj

jaise bahta ho lahu ban ke badan mein suraj

kam-nigahi se zamane ne unhen phul kaha

warna hum ne to ugae the chaman mein suraj

raat-bhar hum ne ujalon ki nigahbani ki

subh ko baT gaya ek ek kiran mein suraj

kaisi ye pyas hai maujon ki jo bujhti hi nahin

roz utarta hai samundar ke dahan mein suraj

mere sae ne mujhe aise chhupa rakkha hai

jis tarah chand se aata hai gahan mein suraj

hath mein le ke ‘asa tum yad-e-baiza to dikhao

log dekhen to sahi sanp ke phan mein suraj

zist ne dagh jo baKHshe hain chamakne do 'asar'

mat chhupao abhi lafzon ke kafan mein suraj