yun dekhne mein to upar se saKHt hun shayad

yuuñ dekhne meñ to uupar se saḳht huuñ shāyad

magar darūn-e-badan laḳht laḳht huuñ shāyad

mire nasīb meñ likkhī hai shab kī tārīkī

maiñ Dūbte hue sūraj kā baḳht huuñ shāyad

qarīb o duur nahīñ hai koī bhī apnā sā

ujaaḌ baaġh kā tanhā daraḳht huuñ shāyad

mujhe kisī ne sunā hī nahīñ tavajjoh se

maiñ bad-zabān sadā-e-karaḳht huuñ shāyad

nahīf kāñdhoñ pe bār-e-ġham-e-do-ālam hai

sarāpā raahū o ketū kā taḳht huuñ shāyad

mirī talāsh meñ hai koī aisā lagtā hai

kisī kā gum-shuda 'shādāb' raḳht huuñ shāyad

yun dekhne mein to upar se saKHt hun shayad

magar darun-e-badan laKHt laKHt hun shayad

mere nasib mein likkhi hai shab ki tariki

main Dubte hue suraj ka baKHt hun shayad

qarib o dur nahin hai koi bhi apna sa

ujaD bagh ka tanha daraKHt hun shayad

mujhe kisi ne suna hi nahin tawajjoh se

main bad-zaban sada-e-karaKHt hun shayad

nahif kandhon pe bar-e-gham-e-do-alam hai

sarapa rahu o ketu ka taKHt hun shayad

meri talash mein hai koi aisa lagta hai

kisi ka gum-shuda 'shadab' raKHt hun shayad