yun dekhte ho kyon mujhe nazren uTha ke tum

yuuñ dekhte ho kyoñ mujhe nazreñ uThā ke tum

dīvāna kar rahe ho tamāsha banā ke tum

sunte haiñ ek nuur hai raushan hijāb meñ

dikhlā do ik jhalak zarā parda uThā ke tum

maiñ huuñ tumhārā aur tumhārā rahūñgā maiñ

kyoñ aazmā rahe ho mujhe aazmā ke tum

ham ko banāyā aa.ina dīdār ke liye

ab muskurā rahe ho ye sūrat miTā ke tum

rusvā.iyoñ kā ḳhauf thā rusvā.iyāñ milīñ

ab kyā karoge rāz-e-mohabbat chhupā ke tum

ye chāñd āsmāñ se zamīñ par utar paḌe

ik baar dekh lo jo ise muskurā ke tum

'zīshān' tum ne dil ko sanam-ḳhāna kar liyā

ab kyā karoge sū-e-haram sar jhukā ke tum

yun dekhte ho kyon mujhe nazren uTha ke tum

diwana kar rahe ho tamasha bana ke tum

sunte hain ek nur hai raushan hijab mein

dikhla do ek jhalak zara parda uTha ke tum

main hun tumhaara aur tumhaara rahunga main

kyon aazma rahe ho mujhe aazma ke tum

hum ko banaya aaina didar ke liye

ab muskura rahe ho ye surat miTa ke tum

ruswaiyon ka KHauf tha ruswaiyan milin

ab kya karoge raaz-e-mohabbat chhupa ke tum

ye chand aasman se zamin par utar paDe

ek bar dekh lo jo ise muskura ke tum

'zishan' tum ne dil ko sanam-KHana kar liya

ab kya karoge su-e-haram sar jhuka ke tum