yuuñ duur duur dil se ho ho ke dil-nashīñ bhī
haiñ to isī jahāñ meñ milte nahīñ kahīñ bhī
kam ek qabr se hai mujh ko ye kul zamīñ bhī
mar rahne kā Thikānā miltā nahīñ kahīñ bhī
tūfān-e-bahr ḳhud haiñ baḌhtī umañgeñ dil kī
kashtī qarār legī ho kar na tah-nashīñ bhī
imkāñ kī had ke andar koshish kī had se bāhar
dil jis ko DhūñDhtā hai vo hai bhī aur nahīñ bhī
ummīd-e-dil kī fitrat hai be-niyāz taskīñ
kam ho na be-qarārī aa.e agar yaqīñ bhī
bīm-o-rajā se dil meñ dariyā kā jazr-o-mad hai
sāhil-navāz maujeñ aa.iiñ bhī aur ga.iiñ bhī
ye multafit nigāheñ sheva viġhā hai jin kā
haiñ mojib-e-sukūñ bhī hañgāma-āfrīñ bhī
kar pahle dil pe qaabū jaame kī phir ḳhabar le
dāman bachāne vaale jaatī hai āstīñ bhī
ḳhatre meñ jaan jis se vo jaan se bhī pyārā
rañgīñ-ezār sho.ala qātil bhī hai hasīñ bhī
sar-gashta-e-mohabbat dār-e-mehan meñ phir kar
dekh aa.e gosha gosha rāhat nahīñ kahīñ bhī
nairañgī-e-talavvun lā-hal sā ik muamma
samjhe jo tere tevar paḌh le ḳhat-e-jabīñ bhī
shān-e-ġhurūr un kī tasvīr ik ruḳhī hai
aur aarzū kī nazreñ shaidā bhī haiñ hasīñ bhī
yun dur dur dil se ho ho ke dil-nashin bhi
hain to isi jahan mein milte nahin kahin bhi
kam ek qabr se hai mujh ko ye kul zamin bhi
mar rahne ka Thikana milta nahin kahin bhi
tufan-e-bahr KHud hain baDhti umangen dil ki
kashti qarar legi ho kar na tah-nashin bhi
imkan ki had ke andar koshish ki had se bahar
dil jis ko DhunDhta hai wo hai bhi aur nahin bhi
ummid-e-dil ki fitrat hai be-niyaz taskin
kam ho na be-qarari aae agar yaqin bhi
bim-o-raja se dil mein dariya ka jazr-o-mad hai
sahil-nawaz maujen aain bhi aur gain bhi
ye multafit nigahen shewa wigha hai jin ka
hain mojib-e-sukun bhi hangama-afrin bhi
kar pahle dil pe qabu jame ki phir KHabar le
daman bachane wale jati hai aastin bhi
KHatre mein jaan jis se wo jaan se bhi pyara
rangin-ezar shoala qatil bhi hai hasin bhi
sar-gashta-e-mohabbat dar-e-mehan mein phir kar
dekh aae gosha gosha rahat nahin kahin bhi
nairangi-e-talawwun la-hal sa ek muamma
samjhe jo tere tewar paDh le KHat-e-jabin bhi
shan-e-ghurur un ki taswir ek ruKHi hai
aur aarzu ki nazren shaida bhi hain hasin bhi
Source:
Nishaan-e-Aarzu (Pg. ebook-104 page-94)
-
Author:
Anwar Husain Arzoo
-
- Year of Publication: 1968
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.