yun fasana kahne ka silsila badal jae

yuuñ fasāna kahne kā silsila badal jaa.e

agle moḌ par shāyad rāsta badal jaa.e

aa.ina badalne se chehra kab badaltā hai

haañ ye ain mumkin hai zāviya badal jaa.e

log mere baare meñ kuchh alag hī kahte haiñ

mujh se mil ke dekheñ to nazriya badal jaa.e

garche lafz-o-ma.anī kā rishta ḳhud hī mub.ham hai

vo agar bayāñ kar deñ vāqi.a badal jaa.e

dushmanoñ se milne kā faisla to merā thā

aap se mileñ shāyad faisla badal jaa.e

baat kahte kahte kyoñ ruk ga.iiñ adhar meñ tum

soch kar kaho shāyad silsila badal jaa.e

bārhā 'anīs' un se mil ke yuuñ to dekh aa.e

ab kī baar mumkin hai nazriya badal jaa.e

yun fasana kahne ka silsila badal jae

agle moD par shayad rasta badal jae

aaina badalne se chehra kab badalta hai

han ye ain mumkin hai zawiya badal jae

log mere bare mein kuchh alag hi kahte hain

mujh se mil ke dekhen to nazriya badal jae

garche lafz-o-mani ka rishta KHud hi mubham hai

wo agar bayan kar den waqia badal jae

dushmanon se milne ka faisla to mera tha

aap se milen shayad faisla badal jae

baat kahte kahte kyon ruk gain adhar mein tum

soch kar kaho shayad silsila badal jae

barha 'anis' un se mil ke yun to dekh aae

ab ki bar mumkin hai nazriya badal jae