yun hi kab tak meri taqdir mein bal aaenge

yuuñ hī kab tak mirī taqdīr meñ bal ā.eñge

aaj kī baat pe kahte ho ki kal ā.eñge

paañv jab jazb-e-mohabbat ke nikal ā.eñge

vādī-e-husn-o-javānī meñ ḳhalal ā.eñge

chal tū le kar hameñ ai mastī-e-zauq-e-sajda

muñh pe ḳhāk-e-dar-e-mahbūb hī mal ā.eñge

hausla shart hai hālāt se māyūs na ho

rāste ḳhud hī chaTānoñ se nikal ā.eñge

karvaTeñ letā hai jab dard-e-mohabbat dil meñ

koī chupke se ye kahtā hai sambhal ā.eñge

jab bahār aa.egī phūloñ pe shabāb aa.egā

tazkire merī tabāhī ke nikal ā.eñge

ab na aa.egā koī sānī-e-'shādāñ' 'anvar'

go bahut ahl-e-suḳhan ahl-e-ġhazal ā.eñge

yun hi kab tak meri taqdir mein bal aaenge

aaj ki baat pe kahte ho ki kal aaenge

panw jab jazb-e-mohabbat ke nikal aaenge

wadi-e-husn-o-jawani mein KHalal aaenge

chal tu le kar hamein ai masti-e-zauq-e-sajda

munh pe KHak-e-dar-e-mahbub hi mal aaenge

hausla shart hai haalat se mayus na ho

raste KHud hi chaTanon se nikal aaenge

karwaTen leta hai jab dard-e-mohabbat dil mein

koi chupke se ye kahta hai sambhal aaenge

jab bahaar aaegi phulon pe shabab aaega

tazkire meri tabahi ke nikal aaenge

ab na aaega koi sani-e-'shadan' 'anwar'

go bahut ahl-e-suKHan ahl-e-ghazal aaenge