yun ek sabaq-e-mehr-o-wafa chhoD gae hum

yuuñ ik sabaq-e-mehr-o-vafā chhoḌ ga.e ham

har raah meñ naqsh-e-kaf-e-pā chhoḌ ga.e ham

duniyā tire qirtās pe kyā chhoḌ ga.e ham

ik husn-e-bayāñ husn-e-adā chhoḌ ga.e ham

māhaul kī zulmāt meñ jis raah se guzre

qindīl-e-mohabbat kī ziyā chhoḌ ga.e ham

begāna rahe dard-e-mohabbat kī davā se

ye dard hī kuchh aur sivā chhoḌ ga.e ham

thī sāmne ālā.ish-e-duniyā kī bhī ik raah

vo ḳhūbi-e-qismat se zarā chhoḌ ga.e ham

ik husn-e-dakan thā ki nigāhoñ se na chhūTā

har husn ko varna ba-ḳhudā chhoḌ ga.e ham

yun ek sabaq-e-mehr-o-wafa chhoD gae hum

har rah mein naqsh-e-kaf-e-pa chhoD gae hum

duniya tere qirtas pe kya chhoD gae hum

ek husn-e-bayan husn-e-ada chhoD gae hum

mahaul ki zulmat mein jis rah se guzre

qindil-e-mohabbat ki ziya chhoD gae hum

begana rahe dard-e-mohabbat ki dawa se

ye dard hi kuchh aur siwa chhoD gae hum

thi samne aalaish-e-duniya ki bhi ek rah

wo KHubi-e-qismat se zara chhoD gae hum

ek husn-e-dakan tha ki nigahon se na chhuTa

har husn ko warna ba-KHuda chhoD gae hum