yun kabhi pindar ka jauhar khule

yuuñ kabhī pindār kā jauhar khule

'aks apne 'aks ke andar khule

dā.ere sab toḌ kar niklā jo maiñ

mujh pe tab ramz-e-mah-o-aḳhtar khule

kahnā āsāñ thā ḳhudā-hāfiz magar

phir darūn-e-qalb sau nashtar khule

‘aql-o-dānish se junūñ se thak chukā

zaat par koī nayā mehvar khule

be-niyāz-e-rang-e-duniyā jab huā

chashm-e-bīnā par 'ajab manzar khule

naam merā hī sar-e-fihrist ho

jab tire 'ushshāq kā mahzar khule

shab Dhale āñkhoñ meñ tab aa.egī niiñd

ḳhaak par jab ḳhaak kā bistar khule

muntazir hai jazba-e-dīda 'zahīr'

dil kī pahnā.ī meñ vo dilbar khule

yun kabhi pindar ka jauhar khule

'aks apne 'aks ke andar khule

daere sab toD kar nikla jo main

mujh pe tab ramz-e-mah-o-aKHtar khule

kahna aasan tha KHuda-hafiz magar

phir darun-e-qalb sau nashtar khule

‘aql-o-danish se junun se thak chuka

zat par koi naya mehwar khule

be-niyaz-e-rang-e-duniya jab hua

chashm-e-bina par 'ajab manzar khule

nam mera hi sar-e-fihrist ho

jab tere 'ushshaq ka mahzar khule

shab Dhale aankhon mein tab aaegi nind

KHak par jab KHak ka bistar khule

muntazir hai jazba-e-dida 'zahir'

dil ki pahnai mein wo dilbar khule