yun kahkashan-e-mohabbat sajate rahte hain

yuuñ kahkashān-e-mohabbat sajāte rahte haiñ

charāġh-e-jism jalāte bujhāte rahte haiñ

aur itne ūñche suroñ meñ ki saañs ukhaḌ jaa.e

shikast-e-jān kā ham naġhma gaate rahte haiñ

kisī zamāne meñ khoyā thā ek dam jis ko

zarā zarā sā use roz paate rahte haiñ

hamīñ nazar hamīñ nāzir hamīñ nazāra bhī

yuuñ apnī āñkhoñ se āñkheñ laḌāte rahte haiñ

hujūm-e-girya meñ uḌte haiñ qahqahe jo 'mirāsh'

kisī kā nauha kisī ko sunāte rahte haiñ

yun kahkashan-e-mohabbat sajate rahte hain

charagh-e-jism jalate bujhate rahte hain

aur itne unche suron mein ki sans ukhaD jae

shikast-e-jaan ka hum naghma gate rahte hain

kisi zamane mein khoya tha ek dam jis ko

zara zara sa use roz pate rahte hain

hamin nazar hamin nazir hamin nazara bhi

yun apni aankhon se aankhen laDate rahte hain

hujum-e-girya mein uDte hain qahqahe jo 'mirash'

kisi ka nauha kisi ko sunate rahte hain