yun log chaunk chaunk kar ungli uThae hain

yuuñ log chauñk chauñk kar uñglī uThā.e haiñ

jaise ham aaj pahle-pahal muskurā.e haiñ

aksar khulī fazāoñ meñ bhī sansanā.e haiñ

ham par hamāre ghar ne vo patthar chalā.e haiñ

ai mauj-e-gul idhar kā abhī ruḳh na kījiyo

kuchh log taaza taaza bayābāñ meñ aa.e haiñ

mahrūmiyoñ ke zahr se ham kab ke mar chuke

ye to ab apne jism kā lāsha uThā.e haiñ

haañ ham ko e'tirāf hai is kā ki ziist ko

ādāb ham ne jurm-e-vafā ke sikhā.e haiñ

dauḌe haiñ log sañg-e-taġhāful liye hue

ham jab bhī apne shahr ke nazdīk aa.e haiñ

fursat kahāñ nasīb qayām-o-qarār kī

ham log vaqt-e-shām daraḳhtoñ ke saa.e haiñ

is darja bhiiḌ itnī ghuTan hai ki al-amāñ

yādoñ kā shahr chhoḌ ke ham bhaag aa.e haiñ

vīrāna-e-ḳhayāl kī vahshat na kam huī

hālāñki baat baat pe ham muskurā.e haiñ

chehre pe paḌ rahī hai tirī be-ruḳhī kī dhuup

siine meñ har taraf tirī yādoñ ke saa.e haiñ

raftār-e-zindagī hai ki māñge hai bijliyāñ

ham haiñ ki be-hisī ko gale se lagā.e haiñ

yāroñ ko haal vādi-e-ġhurbat kā kyā likheñ

mahsūs ho rahā hai ham apne ghar aa.e haiñ

zabt-e-ġham-e-hayāt bhī jin ko na pī sakā

'nāzish' vo ashk ham ne ġhazal meñ chhupā.e haiñ

yun log chaunk chaunk kar ungli uThae hain

jaise hum aaj pahle-pahal muskurae hain

aksar khuli fazaon mein bhi sansanae hain

hum par hamare ghar ne wo patthar chalae hain

ai mauj-e-gul idhar ka abhi ruKH na kijiyo

kuchh log taza taza bayaban mein aae hain

mahrumiyon ke zahr se hum kab ke mar chuke

ye to ab apne jism ka lasha uThae hain

han hum ko e'tiraf hai is ka ki zist ko

aadab hum ne jurm-e-wafa ke sikhae hain

dauDe hain log sang-e-taghaful liye hue

hum jab bhi apne shahr ke nazdik aae hain

fursat kahan nasib qayam-o-qarar ki

hum log waqt-e-sham daraKHton ke sae hain

is darja bhiD itni ghuTan hai ki al-aman

yaadon ka shahr chhoD ke hum bhag aae hain

virana-e-KHayal ki wahshat na kam hui

haalanki baat baat pe hum muskurae hain

chehre pe paD rahi hai teri be-ruKHi ki dhup

sine mein har taraf teri yaadon ke sae hain

raftar-e-zindagi hai ki mange hai bijliyan

hum hain ki be-hisi ko gale se lagae hain

yaron ko haal wadi-e-ghurbat ka kya likhen

mahsus ho raha hai hum apne ghar aae hain

zabt-e-gham-e-hayat bhi jin ko na pi saka

'nazish' wo ashk hum ne ghazal mein chhupae hain