yun mera ashk bahana bhi ek bahana laga

yuuñ merā ashk bahānā bhī ik bahāna lagā

ki merā sach to use jhuuT kā fasāna lagā

vo ik qadam pe hī āñkhoñ se ho gayā ojhal

maiñ jast bhar ke uḌā aur mujhe zamāna lagā

mujhe na ro ye ḳhasāra nahīñ kuchh aur hai dost

savād-e-ishq meñ maiñ kyā mirā gharānā lagā

vo ab mazār pe baiThā huā hai mere liye

use kaho mujhe jiine kī badduā na lagā

vo aa.ina thā ki ik zor-dār qahqaha thā

mujhe to pahlī nazar meñ hī maiñ divāna lagā

vo dūsroñ kī nazar meñ ġhalat sahī 'mahbūb'

burī nazar se bhī dekhā hai to burā na lagā

yun mera ashk bahana bhi ek bahana laga

ki mera sach to use jhuT ka fasana laga

wo ek qadam pe hi aankhon se ho gaya ojhal

main jast bhar ke uDa aur mujhe zamana laga

mujhe na ro ye KHasara nahin kuchh aur hai dost

sawad-e-ishq mein main kya mera gharana laga

wo ab mazar pe baiTha hua hai mere liye

use kaho mujhe jine ki baddua na laga

wo aaina tha ki ek zor-dar qahqaha tha

mujhe to pahli nazar mein hi main diwana laga

wo dusron ki nazar mein ghalat sahi 'mahbub'

buri nazar se bhi dekha hai to bura na laga