yun mukafat-e-amal sab kuchh uTha kar le gaya

yuuñ mukāfāt-e-amal sab kuchh uThā kar le gayā

sar-phirā sailāb bastī ko bahā kar le gayā

sāya-e-rahmat saroñ pe un ke rahtā hai mudām

jab bhī koī apne dushman ko manā kar le gayā

jab khulā bāb-e-hidāyat ishq-e-bazm-e-nūr meñ

vādī-e-zulmat se aasī ko uThā kar le gayā

soz-e-bātin se maiñ rahtā huuñ musalsal muztarib

ḳhauf-e-mahshar niiñd bhī merī uḌā kar le gayā

lāpata haiñ jaane vaale yuuñ farishta maut kā

un ko har naqsh-e-qadam apnā miTā kar le gayā

mil ga.ī bār-e-ta.ayyush se mujhe 'sāhil' najāt

māl-o-zar rahzan mirā saarā churā kar le gayā

yun mukafat-e-amal sab kuchh uTha kar le gaya

sar-phira sailab basti ko baha kar le gaya

saya-e-rahmat saron pe un ke rahta hai mudam

jab bhi koi apne dushman ko mana kar le gaya

jab khula bab-e-hidayat ishq-e-bazm-e-nur mein

wadi-e-zulmat se aasi ko uTha kar le gaya

soz-e-baatin se main rahta hun musalsal muztarib

KHauf-e-mahshar nind bhi meri uDa kar le gaya

lapata hain jaane wale yun farishta maut ka

un ko har naqsh-e-qadam apna miTa kar le gaya

mil gai bar-e-tayyush se mujhe 'sahil' najat

mal-o-zar rahzan mera sara chura kar le gaya