yun qatl-e-am nau-e-bashar kar diya gaya

yuuñ qatl-e-ām nau-e-bashar kar diyā gayā

rāsiḳh tabī.atoñ hī meñ Dar kar diyā gayā

tārīḳh surḳh-rū hai inhīñ hādsāt se

jin hādsoñ se qat-e-nazar kar diyā gayā

is Dar se jaag uThe na kahīñ rāste kī chaap

kuchh qāfiloñ ko shahr-badar kar diyā gayā

sar dosh par rahā na rahā lekin āḳhirash

ye ma.arka-e-saḳht bhī sar kar diyā gayā

maqsūd to thā husn-e-tulū-o-ġhurūb kā

parda miyān-e-shām-o-sahar kar diyā gayā

alfāz dil kī aag se mahrūm ho ga.e

jab shā.irī ko sirf hunar kar diyā gayā

kuchh pattharoñ meñ qaid rahe umr bhar 'zamīr'

thī qabr asl meñ jise ghar kar diyā gayā

yun qatl-e-am nau-e-bashar kar diya gaya

rasiKH tabiaton hi mein Dar kar diya gaya

tariKH surKH-ru hai inhin hadsat se

jin hadson se qat-e-nazar kar diya gaya

is Dar se jag uThe na kahin raste ki chap

kuchh qafilon ko shahr-badar kar diya gaya

sar dosh par raha na raha lekin aaKHirash

ye marka-e-saKHt bhi sar kar diya gaya

maqsud to tha husn-e-tulu-o-ghurub ka

parda miyan-e-sham-o-sahar kar diya gaya

alfaz dil ki aag se mahrum ho gae

jab shairi ko sirf hunar kar diya gaya

kuchh pattharon mein qaid rahe umr bhar 'zamir'

thi qabr asl mein jise ghar kar diya gaya