yun sang na peDon ki kisi Dal pe maro

yuuñ sang na peḌoñ kī kisī Daal pe maaro

ik jast-e-nazar panchhiyoñ ke haal pe maaro

mujh paikar-e-ḳhāmosh meñ ik shor chhupā hai

patthar koī shīshe ke ḳhad-o-ḳhāl pe maaro

ai tā.iro shāyad ki nikal aa.e koī raah

sab mil ke agar choñch sadā jaal pe maaro

tārīf karo merī agar sach hai mirī baat

gar jhuuT kahūñ chāñTā mire gaal pe maaro

maanā ki tahī-dast huuñ ḳhud.dār huuñ maiñ bhī

yuuñ ta.ana musalsal na mire haal pe maaro

ham ḳhāk-nashīnoñ kī sadā jeb-talāshī

shab-ḳhūn kabhī ahl-e-zar-o-māl pe maaro

'merāj' ubhar aa.egī āvāz kī tahrīr

kankar jo kisī so.e hue taal pe maaro

yun sang na peDon ki kisi Dal pe maro

ek jast-e-nazar panchhiyon ke haal pe maro

mujh paikar-e-KHamosh mein ek shor chhupa hai

patthar koi shishe ke KHad-o-KHal pe maro

ai tairo shayad ki nikal aae koi rah

sab mil ke agar chonch sada jal pe maro

tarif karo meri agar sach hai meri baat

gar jhuT kahun chanTa mere gal pe maro

mana ki tahi-dast hun KHuddar hun main bhi

yun tana musalsal na mere haal pe maro

hum KHak-nashinon ki sada jeb-talashi

shab-KHun kabhi ahl-e-zar-o-mal pe maro

'meraj' ubhar aaegi aawaz ki tahrir

kankar jo kisi soe hue tal pe maro