yuuñ subuk-dosh huuñ jiine kā bhī ilzām nahīñ
aah itnī baḌī duniyā meñ koī kaam nahīñ
merī tahqīq mirā husn-e-nazar aam nahīñ
koī aalam ho mire aa.ine meñ shaam nahīñ
os dāman pe hai āñkhoñ meñ namī kī jhalkī
sub.h hone pe bhī āsūdgī-e-shām nahīñ
mast huuñ nashsha-e-parvāz meñ ab hosh kahāñ
ham-navā dekh mirā ruḳh to sū-e-dām nahīñ
mātam ab ḳhaak karūñ be-sar-o-sāmānī kā
ik diyā aaj mayassar hai to ab shaam nahīñ
nashsha-e-hosh pe thī kam-nazarī kī tohmat
khul ga.ī aañkh to ab koī sar-e-bām nahīñ
yaad haiñ chashm-e-navāzish ke vo paiham nashtar
ab to begāna-nigāhī kā bhī paiġhām nahīñ
koī surḳhī ho to afsāna samajh meñ aa.e
haa.e vo dil kī ḳhalish jis kā koī naam nahīñ
ġhusl-e-tauba ke liye bhī nahīñ miltī hai sharāb
ab hameñ pyaas lagī hai to koī jaam nahīñ
phir ujālā hī ujālā nazar aatā hai 'sirāj'
dil ho bedār to duniyā meñ kabhī shaam nahīñ
yun subuk-dosh hun jine ka bhi ilzam nahin
aah itni baDi duniya mein koi kaam nahin
meri tahqiq mera husn-e-nazar aam nahin
koi aalam ho mere aaine mein sham nahin
os daman pe hai aankhon mein nami ki jhalki
subh hone pe bhi aasudgi-e-sham nahin
mast hun nashsha-e-parwaz mein ab hosh kahan
ham-nawa dekh mera ruKH to su-e-dam nahin
matam ab KHak karun be-sar-o-samani ka
ek diya aaj mayassar hai to ab sham nahin
nashsha-e-hosh pe thi kam-nazari ki tohmat
khul gai aankh to ab koi sar-e-baam nahin
yaad hain chashm-e-nawazish ke wo paiham nashtar
ab to begana-nigahi ka bhi paigham nahin
koi surKHi ho to afsana samajh mein aae
hae wo dil ki KHalish jis ka koi nam nahin
ghusl-e-tauba ke liye bhi nahin milti hai sharab
ab hamein pyas lagi hai to koi jam nahin
phir ujala hi ujala nazar aata hai 'siraj'
dil ho bedar to duniya mein kabhi sham nahin
Source:
Shola-e-Aawaz (Pg. e-179 p-178)
-
Author:
Siraj Lakhnavi
-
- Edition: 1920
- Publisher: Nizami Press, Lucknow
- Year of Publication: 1920
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.