yun sukunat ki talabgar hui jati hai

yuuñ sukūnat kī talabgār huī jaatī hai

zindagī sāya-e-dīvār huī jaatī hai

har mulāqāt pe kuchh aur bahaktī nazreñ

kyā tirī zaat pur-asrār huī jaatī hai

sub.h kahtī hai mire saath chalo aage baḌho

mat kaho ziist girāñ-bār huī jaatī hai

yuuñ samā.ī hai tirī saañs mirī sāñsoñ meñ

har-nafas garmī-e-afkār huī jaatī hai

Dagmagā kar hī mirī ziist sañbhaltī hai zarā

kaun kahtā hai ki be kaar huī jaatī hai

ruuh to jism se rishte ko nibhāne ke liye

maut se barsar-e-paikār huī jaatī hai

justujū us kī agar koī ḳhatā hai 'ādil'

ye ḳhatā mujh se lagātār huī jaatī hai

yun sukunat ki talabgar hui jati hai

zindagi saya-e-diwar hui jati hai

har mulaqat pe kuchh aur bahakti nazren

kya teri zat pur-asrar hui jati hai

subh kahti hai mere sath chalo aage baDho

mat kaho zist giran-bar hui jati hai

yun samai hai teri sans meri sanson mein

har-nafas garmi-e-afkar hui jati hai

Dagmaga kar hi meri zist sanbhalti hai zara

kaun kahta hai ki be kar hui jati hai

ruh to jism se rishte ko nibhane ke liye

maut se barsar-e-paikar hui jati hai

justuju us ki agar koi KHata hai 'adil'

ye KHata mujh se lagatar hui jati hai