yun to hai zer-e-nazar har majra dekha hua

yuuñ to hai zer-e-nazar har mājrā dekhā huā

phir nahīñ dekhā hai vo rañg-e-havā dekhā huā

vo tirā tarz-e-taġhāful ye tirā begāna-pan

vo alag dekhā huā hai ye judā dekhā huā

dekhte the jis ko pahlī baar hairānī se ham

asl meñ pahle hamārā vo bhī thā dekhā huā

toḌ kar hī aarzū pahuñchī kahīñ pāyān-e-kār

ghup-añdhere meñ koī band-e-qabā dekhā huā

dekhnā paḌtā hai kyā batlā.eñ phir kyuuñ baar baar

vo jo manzar thā hamārā bār-hā dekhā huā

farq hī donoñ meñ kuchh baaqī nahīñ ab to koī

kyā nahīñ dekhā huā hai aur kyā dekhā huā

ajnabī mere liye phir bhī hai kyuuñ merā vajūd

dar-ba-dar DhūñDā huā aur jā-ba-jā dekhā huā

ye jo an-dekhī guzargāhoñ pe haiñ mere qadam

shāyad in meñ bhī hai koī rāstā dekhā huā

jo na.ī tarz-o-ravish mujh ko dikhāte ho 'zafar'

ye to merī jaan sab kuchh hai mirā dekhā huā

yun to hai zer-e-nazar har majra dekha hua

phir nahin dekha hai wo rang-e-hawa dekha hua

wo tera tarz-e-taghaful ye tera begana-pan

wo alag dekha hua hai ye juda dekha hua

dekhte the jis ko pahli bar hairani se hum

asl mein pahle hamara wo bhi tha dekha hua

toD kar hi aarzu pahunchi kahin payan-e-kar

ghup-andhere mein koi band-e-qaba dekha hua

dekhna paDta hai kya batlaen phir kyun bar bar

wo jo manzar tha hamara bar-ha dekha hua

farq hi donon mein kuchh baqi nahin ab to koi

kya nahin dekha hua hai aur kya dekha hua

ajnabi mere liye phir bhi hai kyun mera wajud

dar-ba-dar DhunDa hua aur ja-ba-ja dekha hua

ye jo an-dekhi guzargahon pe hain mere qadam

shayad in mein bhi hai koi rasta dekha hua

jo nai tarz-o-rawish mujh ko dikhate ho 'zafar'

ye to meri jaan sab kuchh hai mera dekha hua