yun to pahlu mein mere aae to sharma jae hai

yuuñ to pahlū meñ mire aa.e to sharmā jaa.e hai

aur tasavvur meñ vo zālim be-dhaḌak aa jaa.e hai

baiThe baiThe yaad jab vo bevafā aa jaa.e hai

yuuñ lage hai jaise dil pahlū se niklā jaa.e hai

us ke ruḳh par zulf jab shoḳhī se lahrā jaa.e hai

kyā kahūñ us vaqt dil meñ kyā ḳhayāl aa jaa.e hai

kyā kahūñ us kī judā.ī kyā ġhazab Dhā jaa.e hai

jiite jī hī mujh ko marne kā maza aa jaa.e hai

itnā hī nazdīk tujh ko pā rahā huuñ dil se maiñ

jis qadar o bevafā tū duur hotā jaa.e hai

jitnī jitnī baḌh rahī haiñ ishq kī majbūriyāñ

utnā utnā zindagī kā lutf baḌhtā jaa.e hai

yaad aanā us kā furqat meñ qayāmat ho gayā

laakh samjhātā huuñ par dil hai ki machlā jaa.e hai

yuuñ na Thukrā iltijā barbād dil par rahm kar

sabr kā dāman mire hāthoñ se chhūTā jaa.e hai

jab kamī mahsūs hogī un ko merī har jagah

vo zamān-e-hijr meñ nazdīk aaya jaa.e hai

jab nahīñ hotā koī ġham kā mirī fariyād-ras

dard-e-dil ash'ār ke sāñchoñ meñ Dhaltā jaa.e hai

jab umañDtā hai Dil-e-pur-ġham vufūr-e-dard se

phir kahāñ palkoñ se ashkoñ ko sañbhālā jaa.e hai

ho ke sharminda koī maa.il ho jis dam lutf par

be-ḳhudī-e-shauq meñ phir kis se sambhlā jaa.e hai

ik payām-e-nā-shunīda nāla-e-nā-āfrīd

haa.e vo naġhma jo sāz-e-dil pe gaayā jaa.e hai

ashk bhar-bhar aa.e haiñ is vaqt āñkhoñ meñ mirī

apnī barbādī kā manzar kis se dekhā jaa.e hai

shikva aa hī jaa.e hai 'sāhir' lab-e-māyūs par

yūrish-e-ġham se dil-e-nākām ghabrā jaa.e hai

yun to pahlu mein mere aae to sharma jae hai

aur tasawwur mein wo zalim be-dhaDak aa jae hai

baiThe baiThe yaad jab wo bewafa aa jae hai

yun lage hai jaise dil pahlu se nikla jae hai

us ke ruKH par zulf jab shoKHi se lahra jae hai

kya kahun us waqt dil mein kya KHayal aa jae hai

kya kahun us ki judai kya ghazab Dha jae hai

jite ji hi mujh ko marne ka maza aa jae hai

itna hi nazdik tujh ko pa raha hun dil se main

jis qadar o bewafa tu dur hota jae hai

jitni jitni baDh rahi hain ishq ki majburiyan

utna utna zindagi ka lutf baDhta jae hai

yaad aana us ka furqat mein qayamat ho gaya

lakh samjhata hun par dil hai ki machla jae hai

yun na Thukra iltija barbaad dil par rahm kar

sabr ka daman mere hathon se chhuTa jae hai

jab kami mahsus hogi un ko meri har jagah

wo zaman-e-hijr mein nazdik aaya jae hai

jab nahin hota koi gham ka meri fariyaad-ras

dard-e-dil ash'ar ke sanchon mein Dhalta jae hai

jab umanDta hai Dil-e-pur-gham wufur-e-dard se

phir kahan palkon se ashkon ko sanbhaala jae hai

ho ke sharminda koi mail ho jis dam lutf par

be-KHudi-e-shauq mein phir kis se sambhla jae hai

ek payam-e-na-shunida nala-e-na-afrid

hae wo naghma jo saz-e-dil pe gaya jae hai

ashk bhar-bhar aae hain is waqt aankhon mein meri

apni barbaadi ka manzar kis se dekha jae hai

shikwa aa hi jae hai 'sahir' lab-e-mayus par

yurish-e-gham se dil-e-nakaam ghabra jae hai