yun us pe meri arz-e-tamanna ka asar tha

yuuñ us pe mirī arz-e-tamannā kā asar thā

jaise koī sūraj kī tapish meñ gul-e-tar thā

uThtī thiiñ darīchoñ pe hamārī bhī nigāheñ

apnā bhī kabhī shahr-e-nigārāñ meñ guzar thā

ham jis ke taġhāful kī shikāyat ko ga.e the

aañkh us ne uThā.ī to jahāñ zer-o-zabar thā

shānoñ pe kabhī the tire bhīge hue ruḳhsār

āñkhoñ pe kabhī merī tarah dāman-e-tar thā

ḳhushbū se mo.attar hai abhī tak vo guzargāh

sadiyoñ se yahāñ jaise bahāroñ kā nagar thā

hai un ke sarāpā kī tarah ḳhush-qad o ḳhush-rañg

vo sarv kā paudā jo sar-e-rāhguzar thā

qatre kī tarā.ī meñ the tūfāñ ke nasheman

zarre ke ahāte meñ bagūloñ kā bhañvar thā

is ādam-e-ḳhākī pe sitāroñ kī nazar thī

is ḳhaak pe kuchh jalva-e-yazdāñ kā asar thā

maiñ royā to hañsne kī sadā aa.ī ka.ī yaar

vo jān-e-tamannā pas-e-dīvār-e-nazar thā

'dānish' thā ikahrā mirā pairāhan-e-hastī

be-parda zamāne pe mirā aib-o-hunar thā

yun us pe meri arz-e-tamanna ka asar tha

jaise koi suraj ki tapish mein gul-e-tar tha

uThti thin darichon pe hamari bhi nigahen

apna bhi kabhi shahr-e-nigaran mein guzar tha

hum jis ke taghaful ki shikayat ko gae the

aankh us ne uThai to jahan zer-o-zabar tha

shanon pe kabhi the tere bhige hue ruKHsar

aankhon pe kabhi meri tarah daman-e-tar tha

KHushbu se moattar hai abhi tak wo guzargah

sadiyon se yahan jaise bahaaron ka nagar tha

hai un ke sarapa ki tarah KHush-qad o KHush-rang

wo sarw ka pauda jo sar-e-rahguzar tha

qatre ki tarai mein the tufan ke nasheman

zarre ke ahate mein bagulon ka bhanwar tha

is aadam-e-KHaki pe sitaron ki nazar thi

is KHak pe kuchh jalwa-e-yazdan ka asar tha

main roya to hansne ki sada aai kai yar

wo jaan-e-tamanna pas-e-diwar-e-nazar tha

'danish' tha ikahra mera pairahan-e-hasti

be-parda zamane pe mera aib-o-hunar tha