yun zindagi ko zer-o-zabar kar rahe hain hum

yuuñ zindagī ko zer-o-zabar kar rahe haiñ ham

har din hī gardishoñ meñ basar kar rahe haiñ ham

manzil kī hai talāsh magar ye ḳhabar nahīñ

kāġhaz kī kashtiyoñ meñ safar kar rahe haiñ ham

ai shab sambhal ki tere añdheroñ kī ḳhair ho

ḳhud meñ talāsh najm-o-qamar kar rahe haiñ ham

kuchh hasratoñ ke qāfile kuchh ḳhvāhishoñ ke ghar

bas ḳhvāb ḳhvāb hī meñ basar kar rahe haiñ ham

ḳhurshed ham ko terī tamāzat kā Dar nahīñ

ik tuḳhm-e-nā-tavāñ ko shajar kar rahe haiñ ham

tū rabb-e-kā.ināt hai parvardigār hai

sajde tujhe hī shām-o-sahar kar rahe haiñ ham

ham ne talāsh-e-ishq meñ haarī hai zindagī

ahl-e-junūñ ko aaj ḳhabar kar rahe haiñ ham

hai maqsad-e-hayāt ki manzil mile 'sadaf'

us kī talāsh shām-o-sahar kar rahe haiñ ham

yun zindagi ko zer-o-zabar kar rahe hain hum

har din hi gardishon mein basar kar rahe hain hum

manzil ki hai talash magar ye KHabar nahin

kaghaz ki kashtiyon mein safar kar rahe hain hum

ai shab sambhal ki tere andheron ki KHair ho

KHud mein talash najm-o-qamar kar rahe hain hum

kuchh hasraton ke qafile kuchh KHwahishon ke ghar

bas KHwab KHwab hi mein basar kar rahe hain hum

KHurshed hum ko teri tamazat ka Dar nahin

ek tuKHm-e-na-tawan ko shajar kar rahe hain hum

tu rabb-e-kainat hai parwardigar hai

sajde tujhe hi sham-o-sahar kar rahe hain hum

hum ne talash-e-ishq mein haari hai zindagi

ahl-e-junun ko aaj KHabar kar rahe hain hum

hai maqsad-e-hayat ki manzil mile 'sadaf'

us ki talash sham-o-sahar kar rahe hain hum