yunhi jo karte rahenge mushahida dil ka

yūñhī jo karte raheñge mushāhida dil kā

chamak uThegā kisī roz aa.ina dil kā

hamārī raah meñ dīvār uThā ke duniyā ne

qadam qadam pe baḌhāyā hai hausla dil kā

maqām aisā bhī aatā hai rāh-e-ulfat meñ

qubūl aql bhī kartī hai mashvara dil kā

bhaTak na jaa.e kahīñ dhaḌkanoñ ke jañgal meñ

dimāġh DhūñDne niklā hai rāsta dil kā

ye hichkiyoñ kā tasalsul bilā-sabab to nahīñ

zarūr dil se tumhāre hai silsila dil kā

bas itnī baat pe ham ne shikast kar lī qubūl

kisī ne de diyā chupke se vāsta dil kā

tum apne 'shād' se hargiz na bad-gumāñ honā

ki bad-gumānī se baḌhtā hai fāsla dil kā

yunhi jo karte rahenge mushahida dil ka

chamak uThega kisi roz aaina dil ka

hamari rah mein diwar uTha ke duniya ne

qadam qadam pe baDhaya hai hausla dil ka

maqam aisa bhi aata hai rah-e-ulfat mein

qubul aql bhi karti hai mashwara dil ka

bhaTak na jae kahin dhaDkanon ke jangal mein

dimagh DhunDne nikla hai rasta dil ka

ye hichkiyon ka tasalsul bila-sabab to nahin

zarur dil se tumhaare hai silsila dil ka

bas itni baat pe hum ne shikast kar li qubul

kisi ne de diya chupke se wasta dil ka

tum apne 'shad' se hargiz na bad-guman hona

ki bad-gumani se baDhta hai fasla dil ka