yunhi milte rahen hum tum koi wada na karen

yūñhī milte raheñ ham tum koī vā'da na kareñ

ham ko jiinā hai to ḳhvāboñ pe bharosā na kareñ

maiñ bhī is daur kā insāñ huuñ farishta to nahīñ

aap is tarh mirī āñkhoñ se uljhā na kareñ

phir udhar jaa.eñ usī shaḳhs ko dekheñ dukh ho

is se behtar hai ki us raah se guzrā na kareñ

kaun jaane ki mujhe kab kahāñ jaanā hogā

gardishoñ se ye batā do mirā pīchhā na kareñ

kuchh ḳhayālāt luTere bhī huā karte haiñ

dil ke darvāze khule chhoḌ ke soyā na kareñ

ab ye andāz-e-bayāñ koī na samjhegā 'bashīr'

'ġhālib'-o-'mīr' ke andāz meñ sochā na kareñ

yunhi milte rahen hum tum koi wa'da na karen

hum ko jina hai to KHwabon pe bharosa na karen

main bhi is daur ka insan hun farishta to nahin

aap is tarh meri aankhon se uljha na karen

phir udhar jaen usi shaKHs ko dekhen dukh ho

is se behtar hai ki us rah se guzra na karen

kaun jaane ki mujhe kab kahan jaana hoga

gardishon se ye bata do mera pichha na karen

kuchh KHayalat luTere bhi hua karte hain

dil ke darwaze khule chhoD ke soya na karen

ab ye andaz-e-bayan koi na samjhega 'bashir'

'ghaalib'-o-'mir' ke andaz mein socha na karen