yusuf ki tarah kyon koi bazar mein aae

yūsuf kī tarah kyoñ koī bāzār meñ aa.e

jo narḳh bhī ab tab.a-e-ḳharīdār meñ aa.e

miltī hī nahīñ qaid-e-tamannā se rihā.ī

ham kis qafas-e-be-dar-o-dīvār meñ aa.e

ban ban ke savāneh mirī har vāqi.a guzrā

sab log simaT kar mire kirdār meñ aa.e

vo ishq nahīñ hai ki huvaidā ho nazar se

iḳhlās kahāñ ma.ariz-e-iz.hār meñ aa.e

bandoñ ke tasarruf meñ sahī rizq ḳhudāyā

aa.e to ye ham tak kisī miqdār meñ aa.e

nīlām kiyā bhī to qalam ke na uThe daam

ausāf sab is ahd ke talvār meñ aa.e

phirtā huuñ liye jins-e-vafā shahr meñ 'shaukat'

shāyad nazar-e-sāhab-e-me.ār meñ aa.e

yusuf ki tarah kyon koi bazar mein aae

jo narKH bhi ab taba-e-KHaridar mein aae

milti hi nahin qaid-e-tamanna se rihai

hum kis qafas-e-be-dar-o-diwar mein aae

ban ban ke sawaneh meri har waqia guzra

sab log simaT kar mere kirdar mein aae

wo ishq nahin hai ki huwaida ho nazar se

iKHlas kahan mariz-e-izhaar mein aae

bandon ke tasarruf mein sahi rizq KHudaya

aae to ye hum tak kisi miqdar mein aae

nilam kiya bhi to qalam ke na uThe dam

ausaf sab is ahd ke talwar mein aae

phirta hun liye jins-e-wafa shahr mein 'shaukat'

shayad nazar-e-sahab-e-mear mein aae