yusuf ki tarah raunaq-e-bazar main hi tha

yūsuf kī tarah raunaq-e-bāzār maiñ hī thā

pūñjī thā maiñ hī aur ḳharīdār maiñ hī thā

vo jis ke tiir se mirā siina huā figār

gar tū yaqīñ kare mire ġham-ḳhvār maiñ hī thā

kal mai-kade meñ Thiik hī dekhā thā aap ne

bā-sāhibān-e-jubba-o-dastār maiñ hī thā

us kā to mere vāste āġhosh vā rahā

duniyā-e-āb-o-rang se bezār maiñ hī thā

tā umr apne aap ko detā rahā fareb

poshīda apne aap meñ ġhaddār maiñ hī thā

dekhā ye aap ne mirā andāz-e-ḳhud-kushī

ḳhud apne dushmanoñ kā taraf-dār maiñ hī thā

jis kī binā thī ret pe jis meñ lagī thī laakh

us qasr-e-be-asās kā me.amār maiñ hī thā

ilzām us ko duuñ bhī to kis muñh se ai 'valī'

jab har sulūk-e-bad kā sazā-vār maiñ hī thā

yusuf ki tarah raunaq-e-bazar main hi tha

punji tha main hi aur KHaridar main hi tha

wo jis ke tir se mera sina hua figar

gar tu yaqin kare mere gham-KHwar main hi tha

kal mai-kade mein Thik hi dekha tha aap ne

ba-sahiban-e-jubba-o-dastar main hi tha

us ka to mere waste aaghosh wa raha

duniya-e-ab-o-rang se bezar main hi tha

ta umr apne aap ko deta raha fareb

poshida apne aap mein ghaddar main hi tha

dekha ye aap ne mera andaz-e-KHud-kushi

KHud apne dushmanon ka taraf-dar main hi tha

jis ki bina thi ret pe jis mein lagi thi lakh

us qasr-e-be-asas ka meamar main hi tha

ilzam us ko dun bhi to kis munh se ai 'wali'

jab har suluk-e-bad ka saza-war main hi tha