zahid bhi meri tarah usi par fida na ho

zāhid bhī merī tarah usī par fidā na ho

ka.abe ke parde meñ but-e-kāfir chhupā na ho

taqdīr hai ḳhilāf tumhārī ḳhatā nahīñ

bigḌo hamīñ se aur kisī se ḳhafā na ho

āmīn kah rahe haiñ butān-e-sanam-kada

maqbūl bārgāh-e-ḳhudā kyoñ duā na ho

badlā agar vafā kā jafā ho jahān meñ

o nā-shanās qadr-e-vafā phir vafā na ho

pā-e-sanam pe sar hai tamanna ye dil meñ hai

mere sivā qubūl kisī kī duā na ho

ulTeñ to kis ke sāmne ulTeñ naqāb-e-ruḳh

jab koī un kā dekhne vaalā rahā na ho

qātil ye aarzū tire bismil ke dil meñ hai

ḳhanjar hilāl ban ke gale se judā na ho

baaqī rahe na had koī tere ġhurūr kī

o bevafā jo husn tirā bevafā na ho

sajda kareñ ham us but-e-kāfir ko dair meñ

kuchh be-ḳhudī-e-ishq meñ ḳhauf-e-ḳhudā na ho

apnā ḳhirām-e-nāz abas dekhte ho tum

dekho mirā nishān-e-lahad miT gayā na ho

zāhid haram se laa.e tujhe kaun khīñch kar

gar but-kade meñ jalva-e-shān-e-ḳhudā na ho

marne ke baad un kī hayā ham se kam huī

vo kah rahe haiñ rūThne vaale ḳhafā na ho

ranjīda ho ke dar se jo uThtā huuñ kahte haiñ

duniyā meñ zindagī se koī yuuñ ḳhafā na ho

aate ho tum jo roz ayādat ke vāste

maqsūd is se ye hai ki mujh ko shifā na ho

sāqī-e-pāk-dil hameñ aatā nahīñ maza

jab tak sharīk-e-daur koī pārsā na ho

vo hukm de chuke haiñ ki ab un kī bazm meñ

duniyā kī guftugū ho mirā tazkira na ho

qadmoñ pe sar jhukā.e baḌī der ho ga.ī

bāheñ gale meñ Daal bhī do ab ḳhafā na ho

saaqī pilā ḳhudā ke liye aaj raat bhar

is kī to kuchh ḳhabar nahīñ kal kyā ho kyā na ho

'naushād' vo jo naaz se aa.eñ to dekhnā

jis kā qazā hai naam vo un kī adā na ho

zahid bhi meri tarah usi par fida na ho

kabe ke parde mein but-e-kafir chhupa na ho

taqdir hai KHilaf tumhaari KHata nahin

bigDo hamin se aur kisi se KHafa na ho

aamin kah rahe hain butan-e-sanam-kada

maqbul bargah-e-KHuda kyon dua na ho

badla agar wafa ka jafa ho jahan mein

o na-shanas qadr-e-wafa phir wafa na ho

pa-e-sanam pe sar hai tamanna ye dil mein hai

mere siwa qubul kisi ki dua na ho

ulTen to kis ke samne ulTen naqab-e-ruKH

jab koi un ka dekhne wala raha na ho

qatil ye aarzu tere bismil ke dil mein hai

KHanjar hilal ban ke gale se juda na ho

baqi rahe na had koi tere ghurur ki

o bewafa jo husn tera bewafa na ho

sajda karen hum us but-e-kafir ko dair mein

kuchh be-KHudi-e-ishq mein KHauf-e-KHuda na ho

apna KHiram-e-naz abas dekhte ho tum

dekho mera nishan-e-lahad miT gaya na ho

zahid haram se lae tujhe kaun khinch kar

gar but-kade mein jalwa-e-shan-e-KHuda na ho

marne ke baad un ki haya hum se kam hui

wo kah rahe hain ruThne wale KHafa na ho

ranjida ho ke dar se jo uThta hun kahte hain

duniya mein zindagi se koi yun KHafa na ho

aate ho tum jo roz ayaadat ke waste

maqsud is se ye hai ki mujh ko shifa na ho

saqi-e-pak-dil hamein aata nahin maza

jab tak sharik-e-daur koi parsa na ho

wo hukm de chuke hain ki ab un ki bazm mein

duniya ki guftugu ho mera tazkira na ho

qadmon pe sar jhukae baDi der ho gai

bahen gale mein Dal bhi do ab KHafa na ho

saqi pila KHuda ke liye aaj raat bhar

is ki to kuchh KHabar nahin kal kya ho kya na ho

'naushad' wo jo naz se aaen to dekhna

jis ka qaza hai nam wo un ki ada na ho